Ձեր վստահելի աղբյուրը

ՌԴ արտգործնախարար Սերգեյ Լավրովը Հայաստան է գալիս ոչ թե իշխանություններից պատասխան ստանալու համար, այլ իր այցն է, որտեղ քննարկվելու է մեր հարաբերությունների լայն շրջանակ, և բնական է՝ այն էլ Ադրբեջանի այս վերջին ագրեսիայից հետո, չի կարող շրջանցվել Լեռնային Ղարաբաղի հակամարտության կարգավորման հետ կապված իրավիճակը: Այս մասին այսօր Կառավարության նիստից հետո լրագրողների հետ զրույցում ասաց ՀՀ արտաքին գործերի նախարարի տեղակալ Շավարշ Քոչարյանը՝ անդրադառնալով Լավրովի՝ Հայաստան այցին:

Հարցին, թե ռուսական «Известия» պարբերականը տեղեկություն է տարածել, որ սեղանին հատուկ փաստաթուղթ կա դրված, նա պատասխանեց, որ տարբեր թերթերում տարբեր հոդվածներ են հրապարակվում, որոնց մեծամասնությունն իրականությունից հեռու է:

«Ռուսական լրատվամիջոցների մի մասը տպագրում է, թե որոշ պնդումներ ունի, որոնք չեն համապատասխանում իրականությանը: Պետք է առաջնորդվել ոչ թե, այսպես ասած, լրատվամիջոցներով, այլ պաշտոնական հայտարարարություններով, հաղորդագրություններով»,-նշեց Շավարշ Քոչարյանը:

Անդրադառնալով բանակցությունների վերաբերյալ Հայաստանի դիրքորոշմանը, փոխարտգործնախարարն ասաց, որ Հայաստանի պաշտոնական դիրքորոշումը չի փոխվել. «Ավելին ասեմ՝ ներկա իրավիճակում անհնարին է հաշվի չառնել Ադրբեջանի այն կեցվածքը, այն ագրեսիան, որն իրականացրեց՝ խախտելով արդեն առկա երեք՝ եռակողմ համաձայնագրերը: Եվ բնական է, արդեն ապագա բանակցային գործընթացը պետք է ելնի երկու հանգամանքից: Առաջինը՝ պետք է երաշխավորված լինի կրակի դադարեցումը, քանի որ երբ կրակում են, անհնարին է բանակցել: Այսինքն՝ զինադադարը պետք է պահպանվի: Հաջորդը՝ պետք է հաշվի առնել, որ գործ ունենք մի սուբյեկտի հետ, որն, ի հակառակ իր իսկ միջազգային պարտավորության, իսկ եռակողմ համաձայնագրերը միջազգային պարտավորություններ են, կարող է խախտել»:

Հետևաբար, ըստ նրա, ապագայում էլ ցանկացած փուլում նա կարող է հետ կանգնել իր իսկ ստորագրությունից: Ուստի, պետք է այդ բոլորը հստակ հաշվի առնել, երբ խոսքը վերաբերում է կարգավորման գործընթացին:

Հայաստանի դիրքորոշումը հստակեցնելու վերաբերյալ հարցին էլ Շավարշ Քոչարյանն ասաց. «Այն, ինչ առաջարկել են համանախագահները, իհարկե, հայկական կողմի երազանքը չի եղել, բայց հիմքում ընկած են փոխզիջումային տարբերակներ: Ես ձեզ ավելին ասեմ: Տեսեք՝ կա, այսպես ասած, հետաձգված հանրաքվեի գաղափարը: Իհարկե տարօրինակ էր, երբ արդեն եղել է հանրաքվե, ու Լեռնային Ղարաբաղի ժողովուրդը, լիովին համապատասխան և միջազգային իրավունքի, և այն ժամանակ գործող Խորհրդային Միության Սահմանադրությանը, օրենքներին կազմակերպել է հանրաքվե, իր կամարտահայությունը հստակ արահայտել: Ո՞րն էր հետաձգված հանրաքվեի իմաստը: Ըստ միջնորդների՝ դա ուղղված է նրան, որ, այդպես ասած, Բաքվի իշխանությունները, կարողանան փրկել իրենց դեմքը և ժամանակ ունենան, որ մատուցեն, հրամցնեն իրենց ժողովրդին դրա անհրաժեշտությունը, քանի որ հանրաքվեի արդյունքը, ելնելով այն պայմաններից, որոնք նախապես համաձայնեցված են, գրեթե հասկանալի էր, կանխատեսելի: Բայց այս ժամանակահատվածը ցույց տվեց, որ Բաքուն ոչ թե օգտագործում է այդ ժամանակը հենց դեմքը փրկելու համար, ավելի ճիշտ՝ իր ժողովրդին բացատրելու համար դրա անխուսափելիությունը, այլ գործում է դրա հակառակ ուղղությամբ: Սա արդեն ստիպում է այդ հարցերում բանակցել այլ մոտեցումների մասին»:

Շավարշ Քոչարյանը նշեց նաև, որ չի կարող լինել որևէ նոր մոտեցում, որը Ադրբեջանը կարող է ընկալել որպես իր իրականացրած ագրեսիայի խրախուսում. «Եվ այդ հարցում մենք պետք է լինենք և լինելու ենք շատ հետևողական»: