Ձեր վստահելի աղբյուրը

ՀՀ էկոնոմիկայի նախարար Արծվիկ Մինասյանն այսօր Կառավարության նիստից հետո լրագրողների հետ զրույցում ասաց, որ տեղյակ չէ, թե գազի գինը սպառողների համար երբ կնվազի:

«Սակագնի սահմանման իրավասությունը Հանրային ծառայությունները կարգավարող հանձնաժողովինն է, որը  կարող է դա անել կա՛մ ինքնուրույն նման վարույթ նախաձեռնելով, կա՛մ համապատասխան օպերատորից դիմում ստանալով: Այս պահին ինձ հայտնի չէ նման դիմումի կամ ինքնուրույն վարույթի առկայության մասին»,- նշեց նախարարը:

Դիտարմանը, թե Հանձնաժողովից ասում են, որ այս պահին չունեն վավերացված համաձայնագիր, Արծվիկ Մինասյանն ասաց, որ համաձայնագիրը պետք է ներկայացնի օպերատորը, եթե ցանկանում է վերանայում իրականացնել:  Նախարարը նշեց նաև, որ տեղյակ չէ՝ սահմանին գազի նվազեցման համաձայնագիրն ուժի մեջ մտել է, թե ոչ:

Հարցին՝ արդյոք անորոշություն չկա՞, Արծվիկ Մինասյանը պատասխանեց, որ քանի դեռ գազի գինը փոփոխված չէ, նշանակում է՝ անորոշություն չկա:

«Այն գինն է, որն այսօր գործում է: Ի՞նչ անորոշության մասին է խոսքը: Այն, որ գազի գնի իջնելը միանշանակ մեր տնտեսությանը ձեռնտու է, բոլորդ եք համոզված դրանում: Բայց դա չի նշանակում, որ անորոշություն կա: Անորոշություն չկա»,- ասաց էկոնոմիկայի նախարարը: