Ձեր վստահելի աղբյուրը

Երևանում նախորդ տարի անցկացված  «Ընդդեմ ցեղասպանության հանցագործության» գլոբալ ֆորումի բազմաթիվ մասնակիցները կոչ են արել Հայաստանին մտածելու այն մասին, թե ինչպես Հայաստանը կարող է հարթակ դառնալ ցեղասպանության հանցագործությանն առերեսվող մարդկանց, խմբերի, ժողովուրդների համար: Լրագրողների հետ հանդիպման ժամանակ ասաց ՀՀ Նախագահի աշխատակազմի ղեկավար Վիգեն Սարգսյանը:

«Շատերը խոսում էին այն մասին, որ դա ոչ միայն Հայաստանի իրավունքն է, այլ պարտավորությունը՝ խոսել այդ հանցագործության մասին, պայքարել հանցագործության կանխարգելման ուղղությամբ, այդ հանցագործության զոհերի իրավունքների պաշտպանության համար»,- նշեց նա:

Վ. Սարգսյանը հիշեցրեց, որ հենց Հայաստանի առաջարկով դեկտեմբերի 9-ը հռչակվել է Ցեղասպանության կանխարգելման,  ցեղասպանության զոհերի իրավունքների  պաշտպանության միջազգային օր, և Հայաստանն ամեն տարի այդ օրը ՄԱԿ-ի գլխավոր քարտուղարի գրասենյակի հետ միասին համապատասխան միջացառումներ են կազմակերպելու:

Երկրորդ կարևոր ձեռքբերումը, ըստ նրա, կապված է ցեղասպանագետների խնդիրների հետ, որոնք երկար տարիներ մեծ աշխատանք են կատարում  ցեղասպանության հանցագործության ուսումնասիրությունների, դրա դեմ պայքարի ձևերի քննարկման շուրջ:

«Արձանագրվեց, որ մի մեծ պակաս կա այդ ուղղությամբ: Այդ պակասը հասարակական, քաղաքական պլատֆորմի բացակայությունն է: Կան իրավական որոշ փաստաթղթեր, ընթացակարգեր, բայց չկա քաղաքական այն հարթակը, որտեղ քաղաքական ուժերի, կառավարությունների,  միջազգային կազմակերպություննրի ներկայացուցիչները պարբերաբար հավաքվեն՝ քննարկելու ցեղասպանության հիմնախնդիրները»,- ասաց Վ.Սարգսյանը:

Ըստ նրա, աշխատելով բազմաթիվ գործընկերների հետ եկան այն գաղափարին, որ Հայաստանում 2015-ին կազմակերպված գլոբալ ֆորումը պետք է դառնա պարբերական. «Այն որոշեցինք անցկացնել երկու տարին մեկ անգամ, ապրիլին, Երևանում, հրավիրել խորհրդարանականների, դիվանագետների, միջազգային կազմակերպությունների ներկայացուցիչների»:

Ապրիլի 23-ին Երևանում կայանալու է «Ընդդեմ ցեղասպանության հանցագործության» երկրորդ գլոբալ ֆորումը,  որի ընթացքում, Նախագահի աշխատակազմի ղեկավարի խոսքով, բաց քննարկում է լինելու ոչ միայն Հայոց ցեղասպանության հարցի շուրջ, այլ առհասարակ՝ ցեղասպանության հանցագործության շուրջ:

Ամեն ֆորում ունենալու է իր թեման, այս տարի  ֆորումի  թեման լինելու է փախստականների խնդիրները: Վ.Սարգսյանի խոսքով, ֆորումի մասնակիցները կենտրոնացած են լինելու ցեղասպանության կենդանի վերապրողների խնդիրների վրա, մարդիկ, ովքեր տեսել են արհավիրքն իրենց աչքերով, զգացել են այդ հանցագործությունն իրենց, իրենց ընտանիքների վրա: 

«Վստահ եմ, որ այս տարվա համաժողովն իր ներազդեցությամբ, ներուժով ոչ մի բանով չի զիջելու, շատ առումներով գերազանցելու է առաջին համաժողովին»,- նշեց նա՝ հավելելով, որ ֆորումը, ինչպես նաև ապրիլի 24-ին Երևանում անցկացվող «Ավրորա» մրցանակաբաշխությունը լուսաբանելու են արտասահմանյան 70-ից ավելի լրատվամիջոց:

Խոսելով առաջին ֆորումի արդյունքների մասին, Վ.Սարգսյանն ասաց. «Չափազանց կարևոր բան տեղի ունեցավ առաջին ֆորումի արդյունքում: Կարծում եմ, վաղը կայանալիք երկրորդ ֆորումը կօգնի ամրապնդել այդ արդյունքը. մենք իրականում դադարեցինք խոսել ցեղասպանության մասին, որպես ողբերգության: Մենք շատ երկար անդրադառնում էինք ցեղասպանությանը որպես ազգային ողբեգություն, այնինչ ցեղասպանությունը հստակ նկարագրված հանցագործություն է իր բոլոր հետևանքներով, այն գործիքակազմով, որ միջազգային հանրությունը կարողացել է այս  100 տարիների ընթացքում ձևավորել այդ հանցագործության դեմ պայքարելու,  մեղավորին պատասախանատվության կանչելու, փոխհատուցման խնդիրներ լուծելու համար:Կարծում եմ, որ այս համաժողովի իմաստը և արդյունավետությունը  կարելի է չափել նրանով, թե ինչպես մենք ինքներս սկսեցինք  վերագնահատել մեր հետ տեղի ունեցածը, ինչպես սկսցինք դնել տեղի ունեցածը ավելի լայն համատեքստի մեջ: Դա մեծագույն ձեռքբերում  է»:

Ասուլիսին ներկա ՀՀ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանն ասաց, որ ֆորումին հնչող բոլոր մտքերը, ելույթները, մտահոգությունները կարող են դառնալ տարբեր երկրների խորհրդարանների, միջազգային կազմակերպությունների, ընկերակցությունների համար քննարկման նյութ, որոնք կարող են վերածվել տարբեր փաստաթղթերի:

Նրա խոսքով, իրենց նպատակն այն է, որ Երևանում անցկացվող ֆորումը դարձնել միջազգային հանրության ֆորում:

«Վստահ եմ, որ հաջորդ տարիներին տարբեր պատրվակներով շատ երկրներ են  այս հաթակն իրենցը համարելու»,- նշեց նա: