Ձեր վստահելի աղբյուրը

ԱՄՆ նախագահ Բարաք Օբաման հանդես է եկել Հայոց ցեղասպանությանը 101-րդ տարելիցին նվիրված հայտարարությամբ, որտեղ նախորդ տարիների նման գործածել է «Մեծ եղեռն» եզրույթը: Սպիտակ տան տարածած հայտարարության մեջ մասնավորապես նշվում է. 

«Այսօր հանդիսավոր կերպով ոգեկոչում ենք 20-րդ դարի առաջին զանգվածային վայրագության` Հայոց Մեծ եղեռնի հիշատակը, երբ միլիոն ու կես հայերի տեղահանել, կոտորել և  արտաքսել են Օսմանյան կայսրության վերջին օրերին:

Հարգելով 1915-ի մռայլ  օրերին տուժած մարդկանց հիշատակը և պարտավորվելով սովորել այս ողբերգությունից, որպեսզի այն երբևէ չկրկնվի, հարգանքի տուրք ենք մատուցում նաև նրանց օգնության հասած մարդկանց, որոնց թվում  էր ԱՄՆ դեսպան Հենրի Մորգենթաուն, ով իր ձայնը բարձրացրեց` փորձելով վերջ դնել բռնությանը:  Նման ձայները, ինչպիսին Մորգենթաուինն է, շարունակում են կարևոր լինել վայրագությունների կանխման գործում: Նման ձայները կանխորոշեցին նաև մարդու իրավունքների հաջորդ պաշտպան առաջամարտիկների աշխատանքը, ինչպես Ռաֆայել Լեմկինն էր, ում ջանքերով իրականություն դարձավ ԱՄՆ մարդու իրավունքների առաջին պայմանագիրը:

Սա նաև հայ ժողովրդի ճկունությունը գնահատելու պահն է: Մենք հիշում են, թե ինչպես են հազարավոր հայ փախստականներ տասնյակ տարիներ առաջ նոր կյանք սկսել Միացյալ Նահանգներում` կազմելով կենսունակ ու զարգացած համայնք: Մենք շնորհակալ ենք նաև Հայաստանի ժողովրդին  17 000 սիրիացի փախստականների իրենց երկրում այս դժվարին ժամանակներում  ընդունելու համար:

Անցյալից նայելով ապագային`  մենք շարունակում ենք կարևորել պատմական հիշողությունը` որպես կանխման միջոց,  և կոչ ենք անում փաստերի ամբողջական ու ազնիվ ճանաչման, ինչը կծառայի բոլոր կողմերի շահերին: 

Ես հետևողականորեն հայտնել եմ իմ սեփական տեսակետը 1915-ին տեղի ունեցածի վերաբերյալ, և իմ տեսակետը չի փոխվել: Ես տեսել եմ թե ինչպես են մարդիկ և ազգերը ուժեղ դարձել և կառուցել համերաշխ ապագա՝ առերեսվելով անցյալի ցավոտ պահերին: Մենք ողջունում ենք այն մարդկանց տեսակետները, ովքեր փորձում են նոր լույս սփռել անցյալի մթության վրա` սկսած հայ և թուրք պատմաբաններից մինչև Ֆրանցիսկոս պապը:

Այսօր մենք կանգնած ենք հայ ժողովրդի կողքին`  ողջ աշխարհում հիշելով Մեծ եղեռնի սարսափը և վերահաստատելով մեր աջակցությունը ժողովրդավար, խաղաղ և բարգավաճող Հայաստանին»,- ասել է ԱՄՆ նախագահ Բարաք Օբաման: