Ձեր վստահելի աղբյուրը

Գլոբալ հանրությունը թերագնահատում է փախստականների խնդիրները: Երևանում ընթացող Aurora Dialogues քննարկումների ժամանակ ունեցած ելույթում ասաց Միջազգային ճգնաժամային խմբի պատվավոր նախագահ, «Ավրորա» մրցանակի Ընտրող հանձնաժողովի անդամ Գարեթ Էվանսը:

Ըստ նրա, վերջին տարիներին ամբողջ աշխարհում շատ ավելի երեխաներ, կանայք են տեղահանվել, քան Երկրորդ համաշխարհային պատերազմի ժամանակ: Ներկայացված տվյալների համաձայն, փախստականների թիվն այսօր հաշվում են 60 միլիոն՝ 52 երկրից:

Պատճառները, նրա խոսքով տարբեր են՝ բախումներ, հակամարտություններ: Գարեթ Էվանսը նշեց, որ ամենաշատ փախստականները Սիրիայից են, որոնց 95 տոկոսն ընդունվել է Արևմուտքի կողմից:

Ըստ նրա, միջազգային համայնքը պետք է պատասխանատվություն ստանձի Սիրիայում անվտանգության ապահովման հարցում:

Միջազգային ճգնաժամային խմբի պատվավոր նախագահի համոզմամբ, հակամարտությունները լուծվում են քաղաքական բանակցությունների արդյունքում, շատ հազվադեպ է, որ լուծվում են ռազմական հաղթանակով:

«Քաղաքական բանակցությունների արդյունքում պետք է վերացնել բռնությունները: Ռազմական հաղթանակը երկարաժամկետ խաղաղություն և փախստականների վերադարձ  չի կարող ապահովել»,- ասաց նա՝ հավելելով, որ քաղաքական լավ լուծումների դժվարությամբ է հնարավոր հասնել, անհրաժեշտ է քաղաքական կամք, բարձր որակի դիվանագիտական ռեսուրսներ:

Գարեթ Էվանսի խոսքով, փախստականների հարցի լուծումն անհնարին խնդիր չէ,  բեռը պետք է կիսել, համատեղ աշխատել, այդ թվում նաև անհատներն ունեն իրենց դերակատարությունը:

«Այս խնդրի լուծումը հրամայական է՝ թեթևացնել մարդկանց տառապանքները»,- ընդգծեց նա: