Ձեր վստահելի աղբյուրը

Մեր օրերում ցեղասպանությունների կանխարգելման հարցը մնում է արդիական և հրատապ: Այս մասին հայտարարեց ՀՀ նախագահ Սերժ Սարգսյանը՝ ելույթ ունենալով Երևանում այսօր մեկնարկած «Ընդդեմ ցեղասպանության հանցագործության» երկրորդ գլոբալ ֆորումում:

«Վերջին շրջանում աշխարհը սարսափած հետևում է, թե ինչպես են Մերձավոր Արևելքում «Իսլամական պետության» ահաբեկիչները տանջամահ անում, գլխատում, անդամահատում անմեղ մարդկանց, այդ թվում կանանց, երեխաների ու ծերերի: Աշխարհը վրդովված է այս բարբարոսություններից այն դեպքում, երբ դրա կատարողն ընդամնեը մի ավազակախումբ է, որին դժվար է պատասխանատվության ենթարկել և որի դեմ կարելի է պայքարել միայն հրթիռներով»,-իր խոսքում նշեց ՀՀ նախագահը:

Սերժ Սարգսյանը հարց հնչեցրեց, թե ինչ պատասխանատվություն են կրում միջազգային իրավունքի սուբյեկտ հանդիսացող պետությունները համանման հանցագործություններ խրախուսելու և իրականացնելու համար:

«Ի՞նչ կասեք մի երկրի մասին, որը լինելով միջազգային իրավունքի լիարժեք սուբյեկտ, ՄԱԿ-ի, Եվրոխորհուրդի ու բազմաթիվ այլ կառույցների անդամ, մարդասիրական կոնվենցիաներ ստորագրող կողմ, իր ձեռագրով ոչնչով չի զիջում «Իսլամական պետության» ահաբեկիչներին: Ընդամենը մի քանի շաբաթ առաջ Ադրբեջանի կողմից Լեռնային Ղարաբաղի դեմ նախաձեռնված լայնածավալ հարձակման օրերին ադրբեջանցի զինվորները չբավարարվեցին միայն կրակելով: Նրանք անդամախեղեցին տարեց մարդկանց, հայ զինվորին, կտրեցին նրանց գլուխներն ու կանաջները, սոցիալական ցանցերում իրենց հերոսության դրսևորում այն ցուցադրելով: Եվ այս ամենը Ադրբեջանի իշխանությունների բացահայտ խրախուսմամբ: Տարօրինակ չէ՞ արդյոք, որ նման բարբարոսություններ իրականացնող ու քաղաքակրթական բոլոր նորմերը ոտնահարող նման երկիրն այս օրերին հյուրընկալում է «Քաղաքակրթությունների դաշինք» համաժողովը: Մի՞թե սա հանդուրժելի կեցվածք է: Մենք պետք է հասնենք նրան, որ ատելության այսօրինակ սերմանումները տեղ չունենան ժամանակներում, որ յուրաքանչյուր իշխանություն զերծ մնա նման վարքագծից՝ վախենալով, որ պատասխան է տալու»:

Նշենք, որ «Ընդդեմ ցեղասպանության հանցագործության» երկրորդ գլոբալ ֆորումը  համախմբում  է կառավարությունների, խորհրդարանների, միջազգային և իրավապաշտպան կազմակերպությունների ներկայացուցիչների, միջազգային իրավունքի ականավոր մասնագետների, առաջատար ԶԼՄ-ների ներկայացուցիչների և այլ շահառուների:

Ֆորումի կազմակերպիչները հուսով են, որ այս տարվա քննարկումները և մտքերի փոխանակումը խթան կհանդիսանան ցեղասպանության կանխարգելման արդյունավետ մեխանիզմների և իրագործելի լուծումների մշակման, և այդ ոճրագործությունը մեր ներկայից և ապագայից մեկնընդմիշտ վերացնելու համար: