Ձեր վստահելի աղբյուրը

«Այսօր ես կարող եմ ասել, որ այս իրավիճակում ոչ մի թիզ հող զիջելու մասին խոսք անգամ չի կարող լինել»,-Հայոց ցեղասպանության հուշահամալիրում լրագրողների հետ զրույցում ասաց ՀՀ պաշտպանության նախարար Սեյրան Օհանյանը՝ պատասխանելով հարցին, թե ինչպիսին է բանակի դիրքորոշումը տարածքներ հանձնելու վերաբերյալ խոսակցություններին:

«Այս իրավիճակում մենք միայն պետք է ամեն ինչ անենք վստահության եզրեր գտնենք, մթնոլորտ ստեղծենք և փոխհամաձայնություններ լինեն: Այդ փոխհամաձայնությունների շրջանակներում կարող է համապատասխան ելք ստանալ Արցախյան հարցի լուծումը՝ միայն ու միայն խաղաղ ճանապարհով: Երկխոսություն է պետք, եթե այդ երկխոսությունը չկա, ինչի՞ մասին խոսք կարող է լինել ապագայում»,- նշեց պաշտպանության նախարարը:

Անդրադառնալով Լեռնային Ղարաբաղի հակամարտության բանակցություններին Արցախի մասնակցության վերաբերյալ հարցին, Սեյրան Օհանյանն ընդգծեց, որ այսօր քաղաքական ամբողջ ներուժն աշխատում է այդ ուղղությամբ:

«Իսկ անձամբ իմ տեսակետը միշտ եղել է այն, որ Արցախը` որպես հակամարտության կողմ, պետք է մասնակցի բանակցություններին: Արցախը պետք է բանակցությունների անմիջական մասնակից լինի, հակառակ դեպքում հարցի լուծման վերջնական փուլում մենք պետք է Լեռնային Ղարաբաղի Հանրապետության ղեկավարության հետ նորից զրոյից սկսենք»,-ընդգծեց նախարարը: