Ձեր վստահելի աղբյուրը

Թուրքական կառավարությունը առգրավել է քրդաբնակ Դիարբեքիր քաղաքում գտնվող հայկական պատմական Սուրբ Կիրակոս եկեղեցին, այլ վանքեր ու մասնավոր սեփականություն հանդիսացող տարածքներ՝ հիմնավորելով, թե ցանկանում է վերականգնել դրանք, սակայն մտահոգված բնակիչները ահազանգում են, թե կառավարությունը ցանկանում է քանդել դրանք:Այս մասին գրում է «The New York Times» ամերիկյան պարբերականը: 

Պարբերականը գրում է, որ Թուրքիայի սրտում գտնվող և հիմնականում  քրդերով բնակեցված Դիարբեքիր քաղաքը վերջին  մեկ տարվա ընթացքում դարձել է ռազմական բախումների թատերաբեմ, երբ թուրքական զինված ուժերը գործողություն սկսեցին «Քրդական բանվորական կուսակցության» զինյակների դեմ՝ դրանով վերջ դնելով շուրջ երկու տարի տևած զինադադարին:

Արդյունքում Քաղաքի շատ շրջաններ ավերակների վերածվեցին՝ հարկադրելով հարյուր հազարավոր մարդկանց լքել իրենց կացարանները: Սուրբ Կիրակոս եկեղեցին, որն ամբողջ Մերձավոր Արևելքի ամենամեծ հայկական եկեղեցիներից մեկն է, մարտերի հետևանքով վնասվել է և հարկադրաբար փակել է իր դռները հավատացյալների առաջ:

«Հայերը, ում համար Սուրբ Կիրակոսը  մշակութային կարևոր հուշակոթող է, ինչպես նաև քրդերը կիսում են այն քողարկված օրակարգը, համաձայն որի՝ թուրքական կառավարությունը պատրաստվում է քանդել քաղաքի ավերված թաղամասերը, որտեղ գտնվում է նաև հայկական եկեղեցին: Ըստ  մտահոգ բնակիչների՝ այն թաղամասերում, որտեղ առաջ բնակվում էին քրդերն ու ազգային մյուս փոքրամասնությունները, կառավարությունը պատրաստվում է կառուցել շքեղ բնակելի համալիրներ, որոնք հասանելի կլինեն ավելի հարուստ խավերի համար»,-գրում է սկզբնաղբյուրը: 

Պարբերականը գրում է, որ մի շարք վերլուծաբանների կարծիքով՝ Թուրքիայում գտնվող սիրիացի համեմատաբար ապահովված փախստականները ևս կարող են ապաստան կգնել այնտեղ: 
Թուրք պատմաբան Թաներ Ակչամի կարծիքով՝ էթնիկական ու կրոնական թշնամանքը ժողովրդագրական ինժիներիայի ճանապարհով լուծելու թուրքական կառավարության  քաղաքականությունը  հետ է գնում ավելի քան մեկ դար, և Դիրարբեքիրում տեղի ունեցող զարգացումները պետք է դիտարկել այդ  քաղաքականության համատեքստում:

Անդրադառնալով Սուրբ Կիրակոս եկեղեցուն՝պարբերականը գրում է, որ այն փակվել է 1960-ականներին՝ այցելութների բացակայության պատճառաբանությամ, սակայն 2011թ-ից այն վերաբացվել է՝  ի նշանավորումն հաշտեցման քաղաքականության,որի  շրջանակներում  Ռեջեփ Թաիփ Էրդողանի կառավարությունը վերադարձրեց տասնյակ կառույցներ, որոնք բռնագրավել էին Առաջին աշխարհամարտի ժամանակ: 

«Այդ տարածաշրջանում ապրող բազմաթիվ հայերի համար, ովքեր Ցեղասպանությաքն հետևանքով կորցրել էին կապը իրենց ընտանիքների պատմության հետ և հաճախ դաստիարակվել էին որպես մուսուլմաններ քուրդ ընտանիքների կողմից, եկեղեցին խաղացել է խարսխի դեր, որի միջոցով հայերը վերագտել են իրենց ինքնությունը»,-գրել է պարբերականը: