Ձեր վստահելի աղբյուրը

«Այսօր, կարծում եմ, ունենք քաղաքակիրթ աշխարհի մի հատված, որն ամբողջովին գիտակցում է բոլորի պատասխանատվությունը ցեղասպանությունները կանխելու:  Եվ Հայոց ցեղասպանության ճանաչումը կարևորագույն քայլերից մեկն է առերեսվելու աշխարհի պատմությանը»,- այս մասին այսօր Ծիծեռնակաբերդի հուշահամալիրում լրագրողների հետ զրույցում նշեց ՀՀ կառավարության աշխատակազմի ղեկավար-նախարար Դավիթ Հարությունյանը:

Միաժամանակ նա նշեց, որ ունենք պատեհապաշտ աշխարհ, որոնք այժմեական, այս պահի դրությամբ փորձում են հաշվել զուտ իրենց շահերը, ինչն, իհարկե, ցավալի է:

«Բայց միանշանակ է, որ աշխարհը շարժվելու է ավելի համամարդկային արժեքների ուղղությամբ և տարեցտարի մենք տեսնելու ենք, թե ինչպես է ուժգնանում շարժումը ոչ միայն Հայոց ցեղասպանության ճանաչման, այլ ընդհանրապես ընդդեմ մարդկության դեմ հանցագործությունների»,- ընդգծեց Դաբիթ Հարությունյանը:

Հարցին, թե ԱՄՆ նախագահ Բարաք Օբաման իր ելույթում կրկին չարտասանեց «ցեղասպանություն» բառը, արդյոք սա  սպասելի էր և ինչպես է գնահատում այդ հանգամանքը, Դավիթ Հարությունյանը պատասխանեց. «Իհարկե ցանկալի կլիներ, որ արտասաներ, բայց Օբաման մասնագիտությամբ իրավաբան  է, և եթե դուք նայեք, թե ինչ  ձևակերպումներ է նա օգտագործում արդեն երրորդ տարին շարունակ, ապա կտեսնեք, որ նա ուղղակիորեն մատնանշում է ցեղասպանության հանցագործության բոլոր տարրերը: Այսինքն՝ այն, ինչ միջազգային փաստաթղթերում անվանվում է Ցեղասպանություն, նա ուղղակի այդ ամբողջ բովանդակությունն արտաբերում է իր ելույթում: Այս տեսնակյունից մենք պետք է հակառակ քայլը կատարենք, մենք պետք է հայտնենք մեր շնորհակալությունը, որ մարդը փաստացի ուղղակի անվանում է դա ցեղասպանություն: Նա չի արտաբերում Ցեղասպանություն բառը, դա թերևս քաղաքական նպատակներով, ցավալի է, բայց, ամենակարևորը, բոլոր տարրերը, բոլոր, չկա մի տարր ցեղասպանության, որը նրա խոսքում արտահայտված չլինի»: