Ձեր վստահելի աղբյուրը

«Ավրորա» մրցանակաբաշխության հյուրերն այսօր այցելել են Հայոց ցեղասպանության թանգարան-ինստիտուտ,  ծանոթացել թանգարանի գործունեությանն ու ցուցադրություններին։ Այս մասին տեղեկանում ենք մրցանակաբաշխության ֆեյսբուքյան էջից:

Նշենք, որ «Ավրորա» մրցանակաբաշխությանը  մասնակցելու համար Հայաստան ժամանած հյուրերը, «Ավրորա» մրցանակի հավակնորդները, կազմակերպիչները,  Ընտրող հանձնաժողովի համանախագահ Ջորջ Քլունին նաև հարգանքի տուրք են մատուցել  Հայոց ցեղասպանության զոհերի հիշատակին:

«Ավրորա» մրցանակի մասին
«Ավրորա» մարդասիրական համաշխարհային մրցանակն ամեն տարի շնորհվելու է նրան, ով անձնվիրաբար օգնում է մարդկանց։ Դափնեկիրները ճանաչման են արժանանալու իրենց արարքների բացառիկ ազդեցության և նշանակության համար։ «Ավրորա» մրցանակը շնորհվում է Հայոց ցեղասպանությունը վերապրածների անունից և ի երախտագիտություն նրանց, որոնք փրկության ձեռք մեկնեցին հայ ժողովրդին: Մրցանակին արժանանալու է այն հերոսը, որն օգնում է մարդկանց՝ անձնվիրաբար և բացառիկ ջանքերով: Դափնեկիրն ստանալու է 100․000 ԱՄՆ դոլարի պարգև և նվիրատվության շղթան շարունակելու հնարավորություն. 1.000.000 ԱՄՆ դոլարի դրամաշնորհի ներկայացնելով իրեն ոգեշնչած մարդասիրական կազմակերպություններին։ «Ավրորա» մրցանակի Ընտրող հանձնաժողովի կազմում ընդգրկված են Նոբելյան դափնեկիրներ Էլի Վիզելը, Օսկար Արյասը, Շիրին Էբադին և Լեյմա Գբովեն, Իռլանդիայի նախկին նախագահ Մերի Ռոբինսոնը, մարդու իրավունքների ակտիվիստ Հինա Ջիլանին, Ավստրալիայի նախկին արտգործնախարար և Միջազգային ճգնաժամային խմբի պատվավոր նախագահ Գարեթ Էվանսը, Նյու Յորքի Կարնեգի կորպորացիայի նախագահ Վարդան Գրեգորյանը և օսկարակիր դերասան ու բարերար Ջորջ Քլունին։
«Ավրորա» մրցանակի  դափնեկրի չորս հավակնորդներն են՝ Մարգարիտ Բարանկիցեն՝ Բուրունդիից, բժիշկ Թոմ Քաթինան՝ Սուդանից, Սայիդա Ղուլամ Ֆաթիման՝ Պակիստանից, և Հայր Բերնարդ Կինվին՝ Կենտրոնական Աֆրիկայի Հանրապետությունից:

«Ավրորա» մրցանակի հանձնման արարողությունը կայանալու է այսօր: «Ավրորան» դափնեկրին կշնորհի Ընտրող հանձնաժողովի համանախագահ Ջորջ Քլունին: 

Լուսանկարները՝ մրցանակաբաշխության ֆեյսբուքյան էջից: