Ձեր վստահելի աղբյուրը

Թուրքիան ձերբակալել է հոլանդացի լրագրողին և բողոքներ է ներկայացրել գերմանական և շվեդական նախագծերի դեմ, որոնք հիշատակում են Օսմանյան կայսրության իրականացրած ցեղասպանությունները։ Ինչպես գրում է Euobserver-ը, Թուրքիան ընդլայնում է Եվրամիության իր ուռկանի շրջանակները․ Թուրքիայի պաշտոնյաները շաբաթավերջին բողոքներ են ներկայացրել ընդդեմ Գերմանիայի նվագախմբի և Շվեդիայի հեռուստաալիքի՝ կապված Հայոց ցեղասպանության 2 նախագծերի հետ։

Դրեզդենի սիմֆոնիկ նվագախմբի տնօրեն Մարկուս Ռինդտը գերմանական լրատվամիջոցներին հայտնել է, որ ԵՄ-ում Թուրքիայի դեսպանատունը Եվրոպական հանձնաժողովին խնդրել է հետ վերցնել ապրիլի 30-ին կայանալիք համերգի համար տրված 200 հազար եվրո դրամաշնորհը։

Միջոցառմանը պետք է նշվեր 1,5 մլն հայերի ցեղասպանության տարելիցը, արտասանվելու էր «ցեղասպանություն» տերմինը, ինչը Թուրքիան մերժում է։ Ռինդտը նշել է, որ հանձնաժողովը պահել է դրամաշնորհը, սակայն ընդառաջել է թուրքական կողմին` իր կայքից ջնջելով ծրագրի մասին տեղեկատվությունը: Ռինդտը ԵՄ-ի վրա Թուրքիայի ճնշումն  անվանել է «ազատ արտահայտման դեմ ոտնձգություն»:

Շվեդիայում Թուրքական դեսպանատունը ևս բողոք է ներկայացրել TV4 հեռուստաալիքին՝ խնդրելով «վերանայել» հեռուստատեսությամբ հեռարձակվելիք հայերի ցեղասպանության մասին «Seyfofilmen» վավերագրական ֆիլմի ցուցադրությունը, «քանի որ այն ներկայացնում է միակողմանի տեսակետներ»։

«Այսպիսի զարգացումները մենք երբեք չենք կարող ընդունել։ Մենք բողոքելու ենք ճնշում գործադրելու ցանկացած փորձի դեմ, որը սպառնում է ազատ արտահայտմանը»,-ասվում է TV4 հեռուստաալիքի տարածած հայտարարության մեջ։

Թուրքիայի կողմից Շվեդիայում գրաքննության այս փորձը դատապարտել են Շվեդիայի քաղաքական գործիչները։

«Անընդունելի է, որ Թուրքիան փորձում է լռեցնել Շվեդիայում լրատվամիջոցներին և կառավարությունը պետք է կոշտ դիրքորոշում հայտնի այսպիսի գործողությունների դեմ»,-ասել է Շվեդիայի պատգամավոր Յոնաս Սյոստեդթը՝ առաջարկելով անգամ Թուրքիայից հետ կանչել Շվեդիայի դեսպանին։

Պատգամավորը նշել է, որ այս քայլով պետք է Թուրքիային պարզ հասկացնել, որ այն, ինչ դուք անում եք Թուրքիայում, ինչը շատ վատ է լրատվամիջոցների համար, չեք կարող անել Շվեդիայում։

Ֆիլմը, այնուամենայնիվ, եթեր է հեռարձակվել, սակայն այս միջադեպը, ինչպես գրում է Neurope-ը, ևս մեկ փորձ է Թուրքիայի կողմից՝ իր սահմաններից դուրս խոսքի ազատությունը արգելելու  համար։

Պարբերականն անդրադառնում է նաև Թուրքիայի կողմից գերմանացի և հոլանդացի երգիծաբանների նկատմամբ իրավական հետապնդում իրականացնելու գործողություններին և նշում, որ այս քայլերը անհարմար հարցեր են բարձրացրել՝ ուղղված Եվրամիության ղեկավարներին։

Ապրիլի 23-ին Թուրքիայում հանգստի ժամանած թուրքական ծագում ունեցող հոլանդացի լրագրող Էբրու Ումարը ձերբակալվեց հոլանդական Metro ամսագրում հրապարակված իր հոդվածի համար, որտեղ նա  էրդողանին անվանել էր «գերարժեքության մոլուցքով տառապող բռնապետ» (megalomaniac dictator):
Լրագրողն իր հոդվածը նաև թվիթ էր արել, որն էլ հանգեցրել էր Թուրքիայում ձերբակալման, որտեղ նախագահին վիրավորելը պատժվում է մինչև 4 տարվա ազատազրկմամբ։

Գերմանիայի արդարադատության նախարարը շաբաթ օրը Die Welt-ի հետ հարցազրույցում Գերմանիայի կանցլեր Անգելա Մերկելին, ով գտնվում էր Անկարայում, կոչ էր արել ուղերձ հղել Թուրքիային, որ տեսակետները, արվեստը և մամուլի ազատությունը բանակցելու հարց չեն կարող լինել, սակայն Մերկելը Թուրքիայում այնքան էլ անկեղծ չի եղել։

Ճեպազրույցի ժամանակ, երբ Մերկելին հարց են ուղղել ազատ խոսքի հակասությունների մասին, նա պատասխանել է, որ արդեն իսկ մի քանի անգամ ասվել է, որ իրենք չեն խոսում այս հարցերի մասին, քանի որ ինչ-որ չափով դարձել են Թուրքիայից կախված՝ նկատի ունենալով ԵՄ-Թուրքիա միգրացիոն համաձայնագիրը, որով Թուրքիան պետք է հետ ընդունի Հունաստանից միգրատներին։

Նշենք, որ այս համաձայնագրի դիմաց Թուրքիան պահանջում է մինչև ամառ Եվրամիության հետ ազատ վիզային ռեժիմի հաստատում և ԵՄ-ին Թուրքիայի անդամակցության բանակցությունների ակտիվացում, սպառնալով, հակառակ դեպքում չեղյալ համարել ԵՄ- Թուրքիա համաձայնագիրը։ ԵՄ խորհրդի նախագահ Դոնալդ Տուսկն էլ նախորդ շաբաթ հրապարակած իր հոդվածում նշել էր, որ Թուրքիան շանտաժի է ենթարկում Եվրամիությանը։