Ձեր վստահելի աղբյուրը

Հանրահայտ The Telegraph ու The Guardian պարբերականներն անդրադարձել են նախօրեին Հայաստանում անցկացված «Ավրորո» մրցանակաբաշխությանը, որին մասնակցում էր նաև հոլիվուդյան աստղ Ջորջ Քլունին։

The Telegraph-ն  իր նյութը վերնագրել է Քլունիի խոսքերով․«Իմ ընտանիքը գաղթել է Իռլանդիայից, ասում է Ջորջ Քլունին և ներկայացնում 1մլն դոլար հումանիտար մրցանակը»։

Պարբերականն անդրադարձել է «Ավրորա» մրցանակաբաշխության ժամանակ Ջորջ Քլունիի ելույթին, մեջբերելով դերասանի խոսքերը․«Հիշե՛ք, որ փախստականները մարդիկ են, ինչպես ես և դուք»։

The Telegraph-ը  գրում է, որ  օսկարակիր դերասանը, ով պայքարում է աշխարհում բռնություններին վերջ դնելու համար, իր ելույթում անդրադարձ է կատարում աշխարհում  ստեղծված փախստականների ճգնաժամին։

«Պարզ ճշմարտությունն այն է, որ այս երեկո այստեղ մեզանից յուրաքանչյուրի գտնվելը եղել է ինչ-որ մեկի բարության արարքի արդյունքում։ Մենք բոլորս կանգնած ենք լավ մարդկանց կողքին, ովքեր չեն նայում այլ կողմ, երբ մենք կարիքի մեջ ենք։ Քլունիների ընտանիքը գաղթել է Իռլանդիայի սովից և եկել է ԱՄՆ, որտեղ նրանց գոյության համար անհրաժեշտ էր մի անկյուն, սնունդ և օգնող ձեռք։ Մենք նրանց անվանում ենք փախստականեր, բայց նրանք պարզապես մարդիկ են, իմ և Ձեր նման»,-մեջբերում է Քլունիի խոսքերը The Telegraph-ը։

Պարբերականն անդրադառնում է «Ավրորա» մրցանակաբաշխությանը և նրա 4 հավակնորդների պատմություններին, գրելով, որ «Ավրորա» անդրանիկ մրցանակի դափնեկիր ճանաչվեց Մարգարիտ Բարանկիցեն, այն բացառիկ առաքելության համար, որ Բուրունդիի քաղաքացիական պատերազմի տարիներին փրկել է հազարավոր կյանքեր և խնամել որբերին ու փախստականներին։

Նշվում է նաև, որ մրցանակաբաշխության դատավորների մեջ էին աշխարհահռչակ անձինք, ինչպիսիք են Ջորջ Քլունին,  Իռլանդիայի նախկին նախագահ Մերի Ռոբինսոնը, Նոբելյան խաղաղության մրցանակակիր Էլի Վիզելը։

The Guardian-ը ևս անդրադառնում է Հայաստանում կայացած «Ավրորա» մրցանկաբաշխության ժամանակ Քլունիի ելույթին՝ առանձնացնելով փախստականների խնդիրները։ Պարբերականը գրում է, որ ելույթի ժամանակ Քլունին հայարարել է, որ իր ընտանիքը գաղթել է ԱՄՆ Իռլանդիայի սովից խուսափելու համար։

«Մենք պետք է ավելին անենք պատերազմի և հետապնդման զոհերի համար»,-ասում է Քլունին, ով վավերագրական ֆիլմ է նկարել Սուդանում Դարֆուրի հակամարտության վերաբերյալ։

The Guardian-ը գրում է, որ առաջին անգամ Քլունին Հայաստան էր ժամանել «Ավրորա» մրցանակաբաշխությանը մասնակցելու համար, որը կոչված է ճանաչել նրանց, ովքեր իրենց կյանքն են վտանգում՝ ուրիշների կյանքը փրկելու համար, Հայաստանում նախագահ Սերժ Սարգսյանի հետ միասին մասնակցել է 1915թ․-ի Հայոց ցեղասպանության զոհերի հիշատակի միջոցառմանը, երբ սպանվել են 1,5 մլն հայերը։ Թուրքիան, ինչպես գրում է  The Guardian-ը, վիճարկում է այս պնդումները, որ եղել է ցեղասպանություն։

Մրցանակաբաշխության ժամանակ Քլունին աշխարհին կոչ արեց ճանաչել «Հայոց ցեղասպանությունը»։

The Guardian-ը ևս ներկայացնում է «Ավրորա» մրցանակաբաշխության հավակնորդներին ու նրանց պատմություններն ու գրում, որ մրցանակին է արժանացել Մարգարիտ Բարանկիցեն, ով փրկել է 30 հազար երեխաների կյանք։ «Ավրորա»-ի  մրցանակային ֆոնդը 1մլն դոլար է, որից  հաթողին անձնապես տրվել է 100 հազար դոլար, մնացած գումարը, հաղթողի առաջարկությամբ, տրվում է այն բարեգործական կազմակերպություններին, որոնք ոգեշնչել են նրան։

Reuters-ը մեջբերում է «Ավրորա» մրցանակաբաշխության ժամանակ Քլունիի ողջ ելույթը։

«Տարիներ առաջ, երբ որևէ մեկը կարտասաներ ցեղասպանություն բառը, կար Հայաստանը։ Հայտնի է Հիտլերի խոսքերը, թե ո՞վ է այսօր հիշում հայերին։ Պատասխանն է՝ ողջ աշխարհը, ահա, թե ով»,-ասում է Քլունին։

Reuters-ը գրում է, որ «Ավրորա» մրցանակաբաշխությունն անցկացվելու է ամեն տարի ապրիլի 24-ին Հայաստանում՝ ի պատիվ Հայոց ցեղասպանության վերապրածների և ի երախտագիտություն նրանց փրկողների։

Նշենք, որ Հայոց ցեղասպանությանը և Ջորջ Քլունիի Հայաստան այցին անդրադարձել են միջազգային տասնյակ լրատվամիջոցներ։