Ձեր վստահելի աղբյուրը

ՀՀ-ում իրականացված սահմանադրական փոփոխությունների արդյունքում հաջորդ խորհրդարանում ներկայացված կլինեն նաև եզդի, քուրդ, ասորի և ռուս ազգային փոքրամասնությունների ներկայացուցիչները: Այս մասին հայտարարել է ԱԺ փոխնախագահ Էդուարդ Շարմազանովը Իրաքի Հանրապետության խորհրդարանի արտաքին հարաբերությունների մշտական հանձնաժողովի նախագահ Հասան Համդանին և նրա գլխավորած պատվիրակության հետ հանդիպման ժամանակ:

ԱԺ հասարակայնության հետ կապերի վարչությունից հայտնում են, որ պատվիրակության անդամները Երևան են եկել՝ մասնակցելու «Ընդդեմ ցեղասպանության հանցագործության» երկրորդ գլոբալ համաժողովին:

Խորհրդարանի փոխնախագահը կարևորել է քուրդ և եզդի ժողովուրդների հետ հարաբերությունների զարգացումը և համատեղ պայքարը ցեղասպանությունների կանխարգելման կարևորագույն գործում` նշելով, որ ավելի քան մեկ դար առաջ Թուրքիայի կողմից հայ ժողովրդի նկատմամբ իրականացված ցեղասպանությունն այսօր շարունակվում է արդեն Մերձավոր Արևելքում:

Ըստ աղբյուրի, անդրադառնալով Թուրքիայի և «Իսլամական պետության» քաղաքականությանը տարածաշրջանում, ԱԺ փոխնախագահը նկատել է, որ այսպես կոչված «Իսլամական պետությունը» որևէ ընդհանրություն չունի իսլամի հետ: Նա նշել է, որ տարածաշրջանում կան երկրներ, որոնք փորձում են ԼՂ հակամարտությանը տալ կրոնական երանգ, ինչը որևէ աղերս չունի իրականության հետ:

ԱԺ փոխնախագահը մտահոգություն է հայտնել Մերձավոր Արևելքում քուրդ և եզդի ժողովուրդների նկատմամբ իրականացվող գործողությունների առնչությամբ և դատապարտել ցեղասպան քաղաքականության բոլոր երևույթները:

Իրաքի խորհրդարանի արտաքին հարաբերությունների մշտական հանձնաժողովի նախագահ Հասան Համդանն ԱԺ փոխնախագահին է փոխանցել Իրաքի խորհրդարանի ողջույնները և զորակցություն հայտնել ավելի քան 100 տարի առաջ հայ ժողովրդին պատուհասած Ցեղասպանության կապակցությամբ և նշել, որ լավ են հասկանում հայ ժողովրդի ցավը, քանի որ այսօր այդ ցեղասպան քաղաքականությունն իրականացվում է Մերձավոր Արևելքում: