Ձեր վստահելի աղբյուրը

Ապրիլի սկզբին Ադրբեջանի կողմից սանձազերծված  պատերազմական գործողությունները հաստատում են, որ դա արդյունք է այն ատելության, որ կառուցում են ադրբեջանական իշխանությունները: Լրագրողների հետ հանդիպման ժամանակ ասաց Եվրոպական խորհրդարանի պատգամավոր Ֆրանկ Էնգելը, ով նոր է վերադարձել Ստեփանակերտից:

Ըստ նրա, իրավիճակն ավելի է բարդացվում այս ամենի մեջ իր դերակատարությունն ունեցող Թուրքիայի ներգրավածությամբ և ՌԴ երկակիությամբ:  

Ֆ. Էնգելը նաև նշեց, որ չի կարողանում հասկանալ Մադրիդյան սկզբունքների հիման վրա շարժվող Մինսկի խմբի առաջխաղացումը, ովքեր փորձում են ջանքեր գործադրել և լուծել խնդիրը:

«Այս պահին բանակցությունները, քննարկումներն ընդհատված են,  իրավիճակը թելադրում է, որ հիմա հարցն ավելի  սուր  դրվի, խոսվի Լեռնային Ղարաբաղի Հանրապետության ճանաչման մասին: Միջազգային հանրությունը պետք է և պարտավոր է պաշտպանել, քանի որ ապրիլի սկզբի չորսօրյա պատերազմի ընթացքում և դրանից հետո  ակնհայտ է դառնում, որ Ադրբեջանի նպատակն  ու ցանկությունն է ոչնչացել Ղարաբաղը: Այլևս ոչ ոք չպետք է կասկած ունենա Ադրբեջանի ագրեսիայի վերաբերյալ: Ապացույցներն են՝ ծեր մարդկանց նկարները, ում սպանել էին, գլխատված զինվորները»,- ասաց պատգամավորը՝ ընդգծելով, որ կարող է մեկ այլ ցեղասպանություն գործի դրվել:

Ֆ. Էնգելը նշեց, որ այս ամենն իրեն ուղղորդում է մեկ եզրակացություն. միջազգային հանրությունը պետք է կանխի վտանգը Լեռնային Ղարաբաղի Հանրապետության ճանաչման միջոցով, հստակ հիմքեր են ստեղծված ԼՂՀ-ն որպես անկախ պետություն ճանաչելու համար:

«Միջազգային հանրությունը պետք է ճանաչի ԼՂՀ անկախությունը, որպեսզի կարողանան կանխի ԼՂՀ-ի բնակչությանը սպառնացող  էքզիստենցիալ վտանգը»,- ընդգծեց նա:

Եվրոպական խորհրդարանի պատգամավորի խոսքով, փաստ է, որ հայկական կողմը չի հարձակվում, ագրեսիա չի դրսևորում, այլ պաշտպանում է ինքն իրեն:

«Ես իմ գործընկերների հետ միասին Եվրոխորհրդարանում, այլուր բոլոր ջանքերը պետք է գործադրենք, որպեսզի կարողանանք հասնել ԼՂՀ անկախության ճանաչմանը: Եթե այդ փաստը չլինի, ապա տվյալ ժողովուրդը, ԼՂՀ ինքնին կլինեն մեծ վտանգի մեջ: Դա այն հետևանքը չէ, որ պետք է ունենա քաղաքակիրթ աշխարհը ոչ 2016-ին, ոչ ավելի ուշ»,-ասաց Ֆրանկ Էնգելը:

Նրա խոսքով, եվրոպական ինստիտուտները պետք է ամեն ինչ անեն, որպեսզի Ադրբեջանը համաձայնվի ԵԱՀԿ-ն հրադադարի խախտումների մասով մշտադիտարկումներ իրականացնի: Եվրոպական խորհրդարանի պատգամավորն ընդգծեց, որ Հայաստանն ու ԼՂՀ-ն համաձայնվել են նման մշտադիտարկման իրականացումը:

«Եթե Ադրբեջանը շարունակի դեմ լինել այդ մեխանիզմի գործադրմանը, դա կնշանակի, որ մեր համագործակցությունը, գործընկերությունը որևէ շրջանակներում, ֆորմատով չեն կարող շարունակվել, լինի Արևելյան գործընկերության, կամ այլ առևտրային, բանակցային շրջանակներում:  Սա նշանակում է, որ Ադրբեջանը, ագրեսիվ գործողություններ իրականացնելով  իր հարևանի նկատմամբ,  շարունակում է մերժել մշտադիտարկման գաղափարը»,- ասաց նա: