Ձեր վստահելի աղբյուրը

ԱԺ պատգամավոր Էդմոն Մարուքյանը համոզված է, որ եկել է այն պահը, երբ անհրաժեշտ է օրենսդրորեն կարգավորել պատերազմական իրավիճակում  կամավորակության գործընթացի որոշ իրավական մանրամասներ:

ԱԺ-ում հայտարարությունների ժամին ունեցած ելույթում նա ասաց, որ քաղաքացիական հասարակության ներկայացուցիչներից ստացվել են առաջարկներ, որոնք արժանի են ուշադրության և հաշվի առնվելու օրենքի մշակման ընթացքում:

Պատգամավորը ներկայացրեց մի քանի խնդիրներ, որոնք կարևոր են գործող օրենսդրության մեջ փոփոխություններ կատարելու առումով, ինչպես նաև կան խնդիրներ, որոնք  կարող են աշխատանքային խմքոբ քննարկել

Նա նշեց, որ պետք է պահպանվեն կամավորների աշխատատեղերն ու սուբսիդավորվեն աշխատավարձերը պետության կողմից:

«Գործատուին պետք է տրվի հնարավորություն ժամանակավոր փոխարինող աշխատող ընդունել կամավոր ռազմաճակատ մեկնողի փոխարեն: Կան տեղեկություններ, որ մարդիկ գնացել են ռազմաճակատ, բայց նրանց իրենց աշխատելու վայրերից ազատում են: Սրա հետ կապած գործող օրենսդրության մեջ որոշակի նորմեր կան, բայց այստեղ նաև իրավակիրառ պրակտիկայի պրոբլեմ կա»,- ասաց պատգամավորը:

Է.Մարուքյանն նաև նշեց, որ կամավոր ռազմաճակատ մեկնողների վարկային պարտավորությունները պետք է սուբիսավորվեն պետության կողմից. «Նման կարգավորում չունենք, օրենքով պետք է խնդիրը լուծել»:

Պատգամավորն իր հայտարարության մեջ նաև նշեց, որ պետությունը բոլոր զինծառայողների, կամավորականների կյանքը պետք է ապահովագրի:

Նա նաև առաջարկեց կամավորագրվողների համար զինկոմիսարիատների միջոցով պարբերաբար կազմակերպվեն մարտական, ֆիզիկական պատրաստվածության դասընթացներ: