Ձեր վստահելի աղբյուրը

Անկարան Շվեյցարիայից պահանջում է ցուցահանդեսից հեռացնել մի նկար, որն այն ժամանակ դեռ Թուրքիայի վարչապետ Ռեջեփ Թայիփ Էրդողանին մեղադրում էր Թուրքիայում 2013թ․-ին հակակառավարական ցույցերի ժամանակ երեխային սպանելու մեջ։

Քրդահայ ծագում ունեցող շվեյցարացի լուսանկարիչ Դեմիր Սոնմեզի ցուցահանդեսն այս պահին ներկայացված է Ժնևի «Ազգերի» հրապարակում (Place des Nations), որը գտնվում է ՄԱԿ-ի գրասենյակի դիմացում։

Ինչպես Սոմնեզն ասել է AFP-ին, ցուցահանդեսի նպատակն է կարևորել «ժողովուրդների բազմաթիվ պայքարները»։

Նկարում, որը վիրավորել է Թուրքիայի իշխանություններին, պատկերված է 2013թ․-ի հունիսին Ստամբուլի Գեզի այգում այն ժամանակ վարչապետ Էրդողանի դեմ զանգվածային ցույցերի ժամանակ մահացու վիրավորում ստացած Բերքին Էլվանը, գրում է RT-ն։ 

Նկարի վրա գրված է․ «Իմ անունը Բերքին Էլվան է։ Ոստիկանությունը սպանեց ինձ՝ Թուրքիայի վարչապետի հրամանով»։

Ժնև կանտոնի մամուլի պատասխանատու Ֆիլիպ դ’Էսպինը AFP-ին հայտնել է, որ Թուրքիայի ներկայացուցիչները խնդրել են հեռացնել նկարը, որի վերաբերյալ որոշումը կկայացվի երեքշաբթի՝ քաղաքային իշխանությունների հանդիպման ժամանակ։

Նշենք, որ Թուրքիան շարունակում է ինչպես իր երկրի ներսում, այնպես էլ արտերկրում լրատվամիջոցների և ազատ խոսքի հետապնդումները․Թուրքիայի իշխանություններն արդեն իսկ հասցրել են իրենց բողոքները ներկայացնել Գերմանիային, Նիդերլանդներին, Շվեդիային։ Թուրքիայի պահանջով հետաքննություն է սկսվել գերմանացի երգիծաբան Յան Բոհմերմանի նկատմամբ, ով ZDF հեռուստաընկերության եթերում երգիծական բանաստեղծություն էր կարդացել Էրդողանի մասին։

Նախորդ շաբաթավերջին Թուրքիայում ձեռբակալվեց, այնուհետ երկիրը չլքելու պայմանով ազատ արձակվեց հոլանդացի լրագրող։ Թուրքիան բողոքներ է ներկայացրել գերմանական և շվեդական նախագծերի դեմ,  որոնք հիշատակում են Օսմանյան կայսրության իրականացրած ցեղասպանությունները։ Շվեդիան այս միջամտությունը համարել է անընդունելի և դատապարտել Թուրքիայի կողմից Շվեդիայում գրաքննության փորձերը։