Ձեր վստահելի աղբյուրը

«Սպեղանի»  երգչախումբը  (հիմնադիր, գեղարվեստական ղեկավար և դիրիժոր՝ Սարինա Ավթանդիլյան) մայիսի 3-ին ելույթ է ունենալու Կոմիտասի  թանգարան-ինստիտուտում: Համերգը նվիրված է երգչախումբի 20-ամյակին: Երգչախմբից Panorama.am-ին տեղեկացրեցին, որ համերգին հնչելու է Կոմիտասի և հայ ժամանակակից կոմպոզիտորներ Երվանդ Երկանյանի և  Ջեննի Ասատրյանի խմբերգերը:

Առաջին անգամ կկատարվի Ջեննի Ասատրյանի հինգ խմբերգները՝ գրված Կոմիտասի բանաստեղծությունների հիման վրա. «Սեր  ու  ջեր», «Օրհնություն», «Հունձ», «Աղոթք», «Խորունկ  ու  մուգ»:

Երգչախմբի կատարմամբ կհնչի Երվանդ Երկանյանի «Սիրիուս» ստեղծագործությունը, որը յուրահատուկ տեղ է զբաղեցնում երգչախմբի կենսագրության մեջ:

Արդի խմբերգային զարգացման գործում իր կարևոր ներդրումն ունեցող «Սպեղանի» երգչախումբը շարունակում է իրականացնել նոր ծրագրեր և մտահղացումներ, նպաստել ազգային խմբերգային արվեստի զարգացմանն ու տարածմանը: Երգչախումբը մեծ համբավ և ճանաչում ունի համաշխարհային երաժշտական հասարակայնության շրջանում, համերգներով շրջագայել է Հայաստանում, Արցախում, Ռուսաստանում, Լիբանանում, Իտալիայում, Գերմանիայում, Շվեյցարիայում, Լիտվայում՝ մասնակցելով բազմաթիվ միջազգային փառատոների և արժանանալով Առաջին մրցանակների:

Այս տարվա  ամռանը երգչախումբը հրավիրված է Սանկտ-Պետերբուրգ մասնակցելու Հոգևոր երաժշտության միջազգային փառատոնին: