Ձեր վստահելի աղբյուրը

Ադրբեջանը կրակելու ռացիոնալ կարիք ունի, քանի որ եթե դադարի ընդհանրապես կրակել, աշխարհը կմոռանա Լեռնային Ղարաբաղի հակամարտության  մասին, քանի որ այսօր ուշադրության կենտրոնում են Սիրիան, Իրաքը, Դոնեցկը: Լրագրողների հետ հանդիպման ժամանակ այս մասին ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը:

«Այսինքն՝ պատահականություն չէ, և ոչ էլ Ալիևը նյարդայնացել է, որ սկսել են կրակել: Նրանց պետք է, որ խնդիրը մնա ուշադրության կենտրոնում: Այժմ ուշադրության կենտրոնում են այցելությունները, հեռախոսազանգերը, քանի որ որևէ մեկին պետք չէ, որ այստեղ լայնամասշտաբ պատերազմ լինի»,- նշեց քաղաքագետը:

Նա հավելեց, որ եթե Ադրբեջանը չկրակի, հայկական կողմը չի կրակի. նրան պետք չէ խնդիրը լուծել ռազմական ճանապարհով:

Ալ. Իսկանդարյանի խոսքով, այժմ  ԵԱՀԿ Մինսկի խմբի համանախագահները, մասնավորապես՝ Ռուսաստանը, փորձում են այնպես անել, որ իրավիճակը վերադառնա մինչև ապրիլի 1-ը եղած վիճակին, սահմանափակվեն կրակոցները, վերականգնվի բանակցային գործընթացը՝ որպես անվտանգության թիվ մեկ ֆորմատ:

Միաժամանակ քաղաքագետը նշեց, որ հնարավոր չէ այնպես անել, որ իրավիճակը լինի նույնը, ինչը մինչև ապրիլի 1-ն էր, հնարավոր չէ ընդհանրապես  չկրակել, քանի որ արդեն եղել են ապրիլի սկզբի իրադարձությունները:

Նրա խոսքով, այսօր հայկական կողմն աշխատում է տարբեր ուղղություններով. դիվանագիտական ճանապարհներով՝ փորձելով ազդել Ադրբեջանի վրա մեծ տերությունների հետ աշխատանքի միջոցով, փորձելով վերացնել սպառազինության որոշակի անհավասարակշռությունը, ինչն արդյունք է այն բանի, որ ՌԴ-ի կողմից զենք է տրամադրվել Ադրբեջանին, Հայաստանին՝ դեռ ոչ: Ըստ Ա. Իսկանդարյանի՝ այս ուղղությամբ էլ ակտիվ բանակցություններ են ընթանում: