Ձեր վստահելի աղբյուրը

«Ժամանակն է, որ միջազգային հանրությունը կոնկրետ քայլեր ձեռնարկի, որպեսզի կարգի հրավիրի Ադրբեջանին, վերադարձնի կառուցողական դաշտ: Այդ ժամանակ հնարավոր կլինի շարունակել բանակցային գործընթացը»,- Ազգային ժողովում կառավարության հետ հարցուպատասխանի ժամանակ ասաց  ՀՀ արտաքին գործերի նախարար Էդվարդ Նալբանդյանը՝ պատասխանելով ՀՀԿ-ական պատգամավոր Սամվել Ֆարմանյանի հարցին, թե ինչպիսի՞նն են խաղաղության հեռանկարները, կա արդյո՞ք բանակցային գործընթացով ներկայումս, այս օրերին որևէ հեռանկար հակառակորդին ստիպելու չկրակել շփման գծի ողջ երկայնքով, վերադառնալ բանակցային գործընթաց:

Նախարարն ասաց, որ որ այս օրերին բոլոր հադիպումները, քննարկումները վերաբերում են նրան, թե ինչպես հաղթահարել այն հետևանքները, որոնք ստեղծվել են Ադրբեջանի կողմի սանձազերծած ագրեսիայի, լայնածավալ ռազմական գործողությունների արդյունքում.
«Բանակցային գործընթացի հեռանկարները կապված են նրա հետ, որպեսզի առաջին հերթին վերացվեն այն հետևանքները, որոնք ստեղծվեցին Ադրբեջանի կողմից սանձազերծած լայնածավալ ռազմական գործողությունների արդունքում Արցախի դեմ, հենց դրա մասին է հայտարարել Հայաստանի նախագահը իր վերջին հայտարարությունների, հարցազրույցների մեջ:

Այսօր միջազգային հանրության, եռանախագահող  երրկրների  Հայաստանի հետ միասին ջանքերն ուղղված են հենց այդ հետևանքներիի վերացմանը, բացառվեն ապրիլի սկզբին տեղի ունեցածի հնարավոր կրկնությունները: Դրա մասին էր ասում Ռուսաստանի արտաքին գործերի նախարար Սերգեյ Լավրովն իր այցի ընթացքում: Միայն ասեկոսներ են, թե ինչ-որ փաթեթ է բերել, բանակցություններ են վարվում, որովհետև որևէ բանակցություններ այս պայմաններում դժվար է վարել»:

Է.Նալբանդյանը նաև նշեց, որ սուտ է այն, որ Հայաստանը դուրս է գալիս բանակցություններից, բանակցային գործընթացից, դեմ է այս գործընթացին. «Սին, Ադրբեջանի կողմից երևի իրենց ցանկությունն է ներկայացնել: Հայաստանը երբեք դուրս չի եկել բանակցային գործընթացից, միշտ կողմ է եղել բանակցությունների, խաղաղ ճանապարհով  հիմնախնդրի կարգավորմանը: Հայաստանը չէ, որ հրաժարվել է ամենաբարձր, նախարարների մակարդակով հանդիպումներից»:

ԱԳ նախարարի խոսքով, այսօր նաև ապարդյուն փորձեր են կատարվում հարցականի տակ դնել եռակողմ զինադադարի ուժի մեջ գտնվելը:

«Դրա փորձերը կատարվեցին դիվանագիտական կուլիսներում՝ Վիենայում, Նյու Յորքում, համապատասխան արձագանք եղավ եռանախագահների կողմից, ասացին այն, ինչ մենք՝ եռակողմ անժամկետ զինադադարի համաձայնագրերը, որոնք կնքվել են 1994 և 1995 թվականներին, ուժի մեջ են, անխտիր պետք է իրականացվեն դրանց դրույթները: Դա մեր, միջազգային հանրության, եռանախագահների  կարծիքն է: Եվս մեկ անգամ դա ցույց տվեց, որ Ադրբեջանը, փաստորեն, հակադրվում է միջազգային հանրության կարծիքին:  Դա բավական սխալ հաշվարկներ էին իրենց դիվանագիտության կողմից, որովհետև միգուցե չեք պատկերացնում, թե ինչ պատասխան հնչեց Վիենայում  մեր հարցադրմանը, երբ որ ադրբեջանցիներն ամենաբարձր մակարդակով եռանախագահներին հայտնեցին, որ իրենց դեսպանը այն հայտագիրը, նոտան, որ ուղարկել էր՝ հարցականի տակ դնելով զինադադարի ուժի մեջ գտնվելը, այդ հանձնարարականը չէր ունեցել, ինքնագլուխ  նախաձեռնությամբ էր հանդես եկել, չէր համաձայնեցրել Բաքվի հետ»,- ասաց նա՝ հավելելով, որ Ադրբեջանը դա անում է, որ խուսափի իր կատարած շատ անպատասխանատու քայլերի հետևանքից, ինպես ասում են՝ «գող, սիրտը դող»:

Ըստ նրարարի, սա առաջին անգամ չէ, հայտնի ադրբեջանական ոճ է՝ երբ որևէ բան չունեն պատասխանելու, ձևացնում են, թե տեղյակ չեն. «Ադրբեջանը ձևացնում է, որ տեղյակ չէ՝ ինչպես եղավ ապրիլի 2-ին, տեղյակ է, որ սանձազերծել է լայնածավալ գործողություններ Արցախի դեմ,  տեղյակ չէ, թե ինչքան զոհ է տվել այդ արկածախնդրության արդյունքում, տեղյակ չէ, թե ինչ է նշանակում այն առաջարկը, որը վերաբերում է հրադադարի խախատումների հետաքննության մեխանիզմի ստեղծման, եռանագահող երկրների ԼՂ կարգավորման վերաբերյալ հինգ հայտարարություններից և այլն: Անտեղյակների համար հիշեցնենք, որ տեղեկություն չունենալը չի ազատում պատասխանատվությունից»: