Ձեր վստահելի աղբյուրը

«Ես միշտ ասել եմ, այո, իմ իշխանության ժամանակ էլ, կարող եմ նաև պրպտել գտնել, որ հրապարակային բարձրաձայնել եմ, որ ընտրություններում եղել են լուրջ խախտումներ: Իսկ եթե կա խախտում, նշանակում է, որ արդյունքը չի արտահայտել ժողովրդի կամքն, ուրեմն կեղծվել է»,- Ազգային ժողովում լրագրողների հետ զրույցում ասաց նախկին  արտաքին գործերի նախարար, պատգամավոր Վարդան Օսկանյանը:

Ըստ նրա, եթե խախտում է լինում թեկուզ 10 ձայնով, նշանակում է՝ 10 ձայնով շեղվել է արդյունքից, ուրեմն իսկական արդյունքը չի արտահայտվել, ընտրությունը կեղծվել է:

Միաժամանակ Վ.Օսկանյանը նշեց, որ այդ խախտումներն արդյունքի հետ կարող է կապ չունենան. «Եթե ընտրություններում խախտում է եղել, ուրեմն ընտրությունը կեղծվել է: Դրա դեմ պետք է պայքարել: Կարող է նախագահ է ընտրվել 57 տոկոսով, սակայն իրականությունը 51 տոկոս է: Ես դա համարում եմ կեղծված ընտրություն: Մենք պետք է այդ կասկածը մեր ժողվրդի մտքից հանենք: Այս օրենքը մեզ հնարավորություն է տալիս դա անել: Եթե թեկուզ մի տեղ լցոնում է լինում կամ անտեղի շահարկումներ, որ ընտրությունը խախտումներով է անցել, մեր ժողովրդի մտքի մեջ կասկած է առաջանում: Այն ժամանալ էլ իրավունք չենք ունեցել, այսօր էլ չունենք, վաղն էլ չպետք է ունենանք: Իմ չափով ես պայքարել եմ»:

Հիշեցնենք, որ այսօր Ազգայն ժողովում ունեցած ելույթում Վարդան Օսկանյանն ասել է. «Հայաստանում երկու տասնամյակ ընտրությունները կեղծվել են, մենք դա արձանագրում ենք: Կեղծվել են ընտրակաշառք բաժանելով, կարուսելներ կազմակերպելով, կեղծվել են կրկնակի քվեարկություններով, կեղծվել են բացակաների փոխարեն քվեարկելով, կեղծվել են լցոնումներով: Կեղծվել են հաշվարկների ժամանակ խարդախություններով»:

ԱԺ փոխնախագահ Էդուարդ Շարմազանովն էլ ելույթ ունենալով  Վ.Օսականյանի հետո, մասնավորապես ասել է. «Եթե դուք պնդում եք, որ 20 տարի մեր  ընտրությունները կեղծվել են, ապա գոնե 1998 թվականի և 2003 թվականի նախագահական ընտրություններից հետո դուք Հանրապետության նախագահի կողմից նշանակվել եք արտաքին գործերի նախարար, այդ կեղծված ընտրությունների, ինչպես դուք եք ասում, ես չեմ ասում, կարելի է ենթադրել, որ դուք որպես արտաքին գործերի նախարար և ձեր նշանակումը չի եղել ոչ լեգալ, ոչ լեգիտիմ»: