Քառօրյա պատերազմ. Ռազմական բժիշկները առաջնագծից 10 կիլոմետր հեռավորության վրա կատարել են բացառիկ վիրահատություններ
Քառօրյա պատերազմի օրերին ռազմական բժիշկները գերազանց աշխատանք են կատարել: Այս մասին այսօր լրագրողների հետ հանդիպման ժամանակ ասաց ՀՀ Զինված ուժերի ռազմաբժշկական վարչության պետ գնդապետ Կամավոր Խաչատրյանը՝ հավելելով, որ մարտական գործողությունների առաջին իսկ օրերից բուժծառայությունը ռազմաբժշկական զորամասերում կազմակերպված է եղել, ինչի արդյունքում բոլոր վիրավորներին ժամանակին և ճիշտ կազմակերպված բժշկական օգնություն է տրամադրվել:
Ըստ նրա՝ ռազմական բժիշկները քառօրյա պատերազմի օրերին, նույնիսկ մինչև առաջնագծից 10 կիլոմետր հեռավորության վրա կատարել են բացառիկ վիրահատություններ, այդ թվում՝ պլաստիկ վիրահատություն, որի արդյունքում զինվորի ստորին վերջույթները պահպանվել են, և նա այսօր քայլում է:
«Բացի այդ, բժիշկները կատարել են քներակի, սրտի և այլ վիրահատություններ: Այսպիսով, կարող ենք ասել, որ ռազմաբժշկական զորամասերում կազմակերպված աշխատանքը եղել է լիարժեք, որի արդյունքում գերազանցել ենք բոլոր ցուցանիշները, որոնք որ առ այսօր հայտնի են ռազմաբժշկական ծառայությանը»,- նշեց Կամավոր Խաչատրյանը և հավելեց՝ դա նաև պայմանավորված է նրանով, որ ժամանակին կատարած մարտական պատրաստվածության գործընթացը կազմակերպված է եղել լիարժեք, այսինք՝ մեր զինվորը հնարավորություն է ունեցել ճիշտ պաշտպանվել, ճիշտ հարձակվել, ճիշտ կիրառել իր զենքը:
Ըստ Ռազմաբժշկական վարչության պետի՝ ռազմական բժիշկները կարողացել են անել ամեն ինչ, որպեսզի հնարավորինս նվազեցնեն վիրավորվածների շրջանում հաշմանդամության տոկոսը:
«Բժիշկները պահպանել են գոյություն ունեցող «ոսկյա մեկ ժամվա» սկզբունքը, այսինքն՝ ցանկացած վիրավորի մեկ ժամվա ընթացքում տրամադրվել է կազմակերպված բուժօգնություն, ինչի արդյունքում հոսպիտալային օղակում նվազել է նաև մահերի թիվը»,- ընդգծեց նա՝ հավելելով, որ մինչ օրս հոսպիտալային օղակում գրանցվել է մահվան երկու դեպք, իսկ քաղաքացիական հիվանդանոցներում՝ երեք դեպք: «Ընդհանուր առմամբ՝ գրանցվել է մահվան 5 դեպք»,- ընդգծեց նա:
Կամավոր Խաչատրյանը քառօրյա պատերազմից հետո հանդիպել է առաջնագծում աշխատած բժիշկների հետ. «Ուղղակի կարող եմ ասել՝ ինչպես հայ զինվորները, ռազմական բժիշկները ևս գտնվում են գերազանց հոգեբանական վիճակում»:
Հարցին, թե արդյոք պատերազմական օրերին այլ երկրներից հայ բժիշկներ են ժամանել Հայաստան, Կամավոր Խաչատրյանը նշեց, որ իսկապես եկել են բժիշկներ, բայց դա ամենևին կապված չէ նրա հետ, որ այստեղ բժիշկների պակաս կա: «Արտերկրում ապրող մեր հայրենակիցները ցանկանում էին ինչ-որ ձևով ձեռք մեկնել բանակին: Մենք այդ իրավիճակում բոլոր խնդիրները լուծում էինք, բայց որոշեցինք չմերժել մեզ առաջարկած օգնությունը: Մարդիկ պարզապես ցանկանում են օգնել, բայց ասեմ, որ մենք բանակի ունեցած ռեզերվի չնչին տոկոսն ենք օգտագործել»,- ընդծեց նա:
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
