Ձեր վստահելի աղբյուրը

Ազգային ժողովում Ընտրական օրենսգրքի նախագծի առաջին ընթերցմամբ քննարկման ժամանակ հնչած առաջարկությունների մեծ մասը կընդունվեն: Այդ մասին այսօր ԱԺ-ում իր եզրափակիչ ելույթում հայտարարեց ԸՕ նախագծի հիմնական զեկուցող, կառավարության աշխատակազմի ղեկավար-նախարար Դավիթ Հարությունյանը:

Նա ասաց, որ շնորհակալ է «բովանդակային առաջարկությունների համար» և նկատեց, որ ընդդիմադիր գործընկերների ելույթներում կային հետաքրքիր մտքեր ու դրանք կընդունվեն Ընտրական օրենսգրքի նախագծում:

Հարությունյանը թվարկեց, որ կընդունեն Լյուդմիլա Սարգսյանի, Ալիկ Արզումանյանի, Ռուբիկ Հակոբյանի, Նաիրա Զոհրաբյանի, Տիգրան Ուրիխանյանի, Լևոն Զուրաբյանի, Գագիկ Ջհանգիրյանի առաջարկությունները:

«Առավել ակներև առաջարկությունները, որոնք կընդունենք 100 տոկոսով, հետևյալն են՝ առաջինը ռեգիոնալ կամ տարածքային կուսակցությունների գաղափարն է, շատերը մերժեցին այն և մենք, ամենայն հավանականությամբ, կհրաժարվենք այդ գաղափարից, եղան առաջարկություններ, որ մատնահետքերի վերցման հաջորդականությունը պետք է հստակորեն կարգավորվի», -ներկայացրեց Հարությունյանը:

Անդրադառնալով քննարկման ընթացքում հնչած հայտարարություններին, թե ԸՕ նախագծով ներկայացված համամասնական ընտրակարգը այդքան էլ համամասնական չէ, Հարությունյանն ասաց, որ պետք է համապատասխան գրականություն ուսումնասիրել:

«Եթե կարդային, ապա այստեղ չէին հնչի այնքան տարօրինակ առաջարկություններ, որ ընտրողին ընձեռենք հնարավորություն տալու իր ձայնը մի անձի, իսկ մյուս ձայնը կուսակցությանը: Հենց դա կլիներ վերադարձ այժմյան իրավիճակին: Սա անթույլատրելի է», -հայտարարեց Հարությունյանը: