Ձեր վստահելի աղբյուրը

«Բացարձակ անբարոյական է այստեղ առաջին գծում զոհված զինծառայողների արյունը շահարկելը: Որևէ մեկը իրավունք չունի իր ճղճիմ, անձնական բոնուսները հավաքելու համար, իր էլեկտորատի շահերը սպասարկելու համար շահարկել բանակում զոհված զինվորի արյունը», -այսօր Ազգային ժողովում իր ելույթում հայտարարեց ԱԺ «Բարգավաճ Հայաստան» խմբակցության ղեկավար Նաիրա Զոհրաբյանը:

Նրա ակնարկն ուղղված էր «Ժառանգություն» խմբակցության անդամ Զարուհի Փոստանջյանին, որն իր ելույթում խոսել էր ապրիլյան ռազմական գործողությունների մասին ու մեղադրել իշխանություններին:

Զոհրաբյանի խոսքով, նման վարքագիծն «անբարոյականություն է զոհվածների հարազատների հանդեպ»:

ԲՀԿ-ական պատգամավորը նկատել է նաև, որ քննարկվող Ընտրական օրենսգրքի փոխարեն «վիճարկվում է, թե ով է իրական ընդդիմությունը»:

«Մեկը հերոսական առկախումներով, մյուսը ընդդիմադիր մուրաբաների, պռոթեզների մասին ճառեր ասելով, քասթինգ է սկսվել՝ ժողովուրդ ջան, ես եմ իրական ընդդիմադիրը, ես եմ ուզուրպացրել ընդդիմության տիտղոսը, հանգիստ եղեք, ժողովուրդը բոլորի արժեքը շատ լավ գիտի: Ժողովուրդը շատ լավ գիտի նաև շատերի իրական բազառի գինը ընդդիմության դաշտում գործելու համար», -հայտարարեց Զոհրաբյանը: