Նպատակ ունենք լրջորեն ներազդելու Հայաստանի քաղաքական գործընթացների վրա. Օսկանյան

Քաղաքական 11:15 28/04/2016

Նպատակ ունենք լրջորեն ներազդելու Հայաստանի քաղաքական գործընթացների վրա. Օսկանյան

Մենք նպատակ ունենք լրջորեն ներազդելու Հայաստանի քաղաքական գործընթացների վրա: Այդ մասին իր ֆեյսբուքյան գրառմամբ տեղեկացրել է նորաստեղծ «Համախմբում» կուսակցության նախագահ Վարդան Օսկանյանը:

Նա հայտնել է, որ «Համախմբում» կուսակցության (անգլերեն՝ Unity, ռուսերեն՝ Единение) նախաձեռնող խմբում ներգրավված է Ազգային ժողովի չորս պատգամավոր՝ Էլինար Վարդանյանը, Ստեփան Մարգարյանը, Վահե Հովհաննիսյանը և ինքը, ինչպես նաև մեկ տասնյակ պատկառելի համախոհներ:

«Այժմ, երբ նոր Սահմանադրությամբ մեր ողջ կառավարման ձևը խարսխված է լինելու կուսակցական համակարգի վրա, մեր կուսակցությունը նոր մշակույթ կբերի կուսակցաշինության և դրա գործելաոճի մեջ: Մենք կլինենք բաց և թափանցիկ, հնարավորություն կտանք յուրաքանչյուր անհատի
ինքնադրսևորվելու, կապահովենք սերնդափոխությունը, համարձակորեն և ազնվորեն կբարձրացնենք և կխոսենք առկա թերությունների, ձախողումների և երկրի առաջ ծառացած խնդիրների մասին, ներքաղաքական, սոցիալ-տնտեսական, անվտանգության և արտաքին քաղաքական հարցերում կառաջարկենք հստակ և նպատակային լուծումներ:

Վերջապես, խորհրդարանական հաջորդ ընտրություններին ընդառաջ կփորձենք ձևավորել նոր քաղաքական բևեռ և մեր հանրության ու ընտրողների համար հանդիսանալ այլընտրանք իշխող քաղաքական ուժին:

Այդ ճանապարհին մենք պատրաստ կլինենք, առանց որևէ բացառության, համագործակցելու քաղաքական բոլոր այն ուժերի, կազմակերպությունների և անհատների հետ, որոնք ցանկանում են երկրում տեսնել արմատական փոփոխություններ», -նշել է պատգամավորը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: