Ձեր վստահելի աղբյուրը

«Այդ հայտարարությունը խոստովանություն է առ այն, որ Հայոց ցեղասպանությունից հարյուր տարի անց էլ Թուրքիայի ղեկավարության մտածելակերպը չի փոխվել»,- այս մասին նշել է ՀՀ արտաքին գործերի նախարարի տեղակալ Շավարշ Քոչարյանը՝ պատասխանելով Թուրքիայի նախագահի վերջին հայտարարության վերաբերյալ Tert.am-ի հարցին: Այս մասին տեղեկացնում են ՀՀ ԱԳՆ-ից:

Հիշեցնենք, որ Թուրքիայի նախագահ Ռեջեփ Թայիփ Էրդողանը Երևանին մեղադրել էր ԼՂ հակամարտության սրման մեջ՝ հայտարարելով. «Զինադադարի ռեժիմի խախտումով Հայաստանը կրակի հետ է խաղում: Վերջին իրադարձությունները հակամարտության գոտում ցույց տվեցին, որ Ադրբեջանի բանակը գերակայություն ունի հայկական զինուժի նկատմամբ»:

«Թուրքիայի նախագահը փորձում է սպառնալ Հայաստանին՝ կապակցելով Թուրքիայում բնակվող հայության կախվածությունը երկրի իշխանություններից և այս տարվա ապրիլի 24-ին արված իր ժխտողական հայտարարությունը:

Ըստ այդ հայտարարության՝ Ադրբեջանը նման չէ ոչ հարևան պետություններին, ոչ էլ Ուկրաինային: Մնում է ավելացնել, որ Ադրբեջանը իր այլատյացությամբ, ապակայունության և արյունահեղության ալիք տարածելու մոլուցքով ու ցեղասպան մոտեցումներով նման է և նույնական մեկ պետության՝ Թուրքիայի հետ:

Թե Անկարայի, թե Բաքվի նմանատիպ ջղաձիգ հայտարարություններն արտահայտությունն են իրենց ռասիստական քաղաքականության արդյունքում միջազգային ասպարեզում խորը մեկուսացման մեջ հայտնվելու սարսափի»,- հավելել է Քոչարյանը: