Ձեր վստահելի աղբյուրը

ՀՀ կառավարության այսօրվա նիստի մեկնարկից առաջ վարչապետ Հովիկ Աբրահամյանը Աշխատանքի և սոցիալական հարցերի նախարար Արտեմ Ասատրյանից հետաքրքրվեց, թե ինչ վիճակում են ապրիլյան պատերազմի ընթացքում զոհված և վիրավոր զինծառայողների սոցիալական վիճակները:

Արտեմ Ասատրյանը հայտնեց, որ ԼՂՀ և ադրբեջանական զորքերի շփման գծում 2016 թվականի ապրիլի 1-ից 5-ը տեղի ունեցած ռազմական բախումների հետևանքով զոհված զինծառայողների ընտանիքների սոցիալական հարցերի ուսումնասիրության իրականացման և ընտանիքների կարիքների համակողմանի գնահատման նպատակով ՀՀ վարչապետի 2016 թվականի ապրիլի 7-ի որոշմամբ ստեղծվել է աշխատանքային խումբ, որում ընդգրկված են Աշխատանքի և սոցիալական հարցերի, պաշտպանության, տարածքային կառավարման և զարգացման նախարարությունների ներկայացուցիչներ:

«Խմբի կողմից մշակվել և հաստատվել է զոհված զինծառայողների կարիքների գնահատման համապատասխան մեթոդաբանություն և կազմակերպվել են աշխատանքները»,- նշեց Արտեմ Ասատրյանը:

Ըստ նրա՝ աշխատանքները կազմակերպվել են, հաշվի առնելով ժամանակի սղությունն ու իրավիճակի առանձնահատկությունները. «Ընտանիքների սոցիալական կարիքների նախնական գնահատումը վերաբերել է ընտանիքի կազմին, ընտանիքի անդամների առողջական խնդիրներին, ուսման հետ կապված խնդիրներին, ինչպես նաև զբաղվածության առկա իրավիճակին և հնարավոր զարգացումներին, միաժամանակ ուսումնասիրվել են բնակարանային, կոմունալ և այլ տվյալներ»:

Ընդհանուր առմամբ, ըստ նրա, ուսումնասիրվել են ապրիլի 1-ից 4-ը զոհված 64 զինծառայողների ընտանիքների կարիքները՝ ըստ բնակության վայրի՝ Երևան և 9 մարզեր:

Արտեմ Ասատրյանի խոսքերով՝ ուսումնասիրված ընտանիքների անչափահաս երեխաներ՝ մինչև 18 տարեկան երեխա ունեցող ընտանիքների թիվը 17 է, ուսանող ունեցող ընտանիքներ ևս կան:

«Զբաղվածության և աշխատանքի կարիք ունեցող ընտանիքների անդաներից ոմանք ցանկություն են հայտնել գյուղատնտեսական աշխատանքներվ զբաղվելու: Առողջական խնդիրներ ու բժշկական օգնության հետ կապված՝ զոհված զինծառայողների որոշ ընտանիքների անդամներ ունեն բժշկական հետազոտության կարիք, ինչպես նաև հոգեբանական ծառայության կարիք»,-տեղեկացրեց Արտեմ Ասատրյանը՝ հավելելով, որ  մի մասն ունի նաև վարկային պարտավորություններ:

Նախարարը նաև տեղեկացրեց, որ երեք զոհված զինծառայողների եղբայրներն էլ ներկայումս պարտադիր զինվորական շարքային կազմի ծառայողներ են:

«Ուզում եմ նաև տեղեկացնել, որ նշված ընտանիքների սոցիալական  խնդիրների լուծմանն ուղղված հարցերը ի սկզբանե գտնվել են մարզպետարանների, Երևանի քաղաքապետարանի և ՏԻՄ-երի ուշադրության կենտրոնում, իսկ պաշտպանության նախարարության  և պաշտպանության բանակի, ինչպես նաև մեր բազմաթիվ հայրենակիցների և կազմակերպությունների կողմից նշված ընտանիքներին տրամադրվել և շարունակվում են տրամադրվել դրամական օժանդակություններ»,- ասաց Արտեմ Ասատրյանը: 

Նշեց նաև, որ օրենսդրությամբ սահմանված է 2 մլն դրամ ապահովագրական վճար  մարտական գործողությունների ժամանակ զոհվելու դեպքում, ինչպես նաև 1 մլն 400 հազար դրամ հուղարկավորության կազմակերպման և 700 հազար դրամ գերեզմանի  բարեկարգման համար, որոնք վճարվում են ՀՀ ՊՆ-ի կողմից: Իսկ ընտանիքների անաշխատունակ անդամներին նշանակվում են ամսական վճարվող կենսաթոշակներ և պարգևավճարներ՝ օրենսդրությամբ սահմանված չափերով:

Արտեմ Ասատրյանը հայտնեց, որ այս ընթացքում մեր բազմաթիվ քաղաքացիներ և կազմակերպություններ  շարունակում են պատրաստակամություն հայտնել օգնության ձեռք մեկնել նշված ընտանիքներին, ուստի այս գործընթացները առավել նպատակային դարձնելու համար, ըստ նրա,  առաջարկում են այն դնել համակարգային հիմքերի վրա՝ ընդգկելով սոցիալական աշխատողի ինստիտուտը: 

Անդրադառնալով աշխարհազորայինների հետ կապված խնդիրներին, Արտեմ Ասատրյանը նշեց, որ քննարկումների արդյունքում նախատեսում են շրջանառության մեջ դնել համապատասխան որոշման նախագիծ, միաժամանակ նախնական ուսումնասիրություն է կատարվել նաև մարտական գործողությունների ընթացքում վիրավորված և տարբեր բուժհաստատություններում բուժվող զինծառայողների վերաբերյալ, որի շրջանակներում կատարվել է այցելություն 7 հիվանդանոց:

«Նրանք բոլորն էլ ստանում են բարձրակարգ ծառայություններ  մեր առողջապահական հաստատություններում, և մեր ուշադրության կենտրոնում կպահենք նրանց՝  հետագա սոցիալական ծառայությունների տրամադրումը պատշաճ  մակարդակով կազմակերպելու համար»,- ասաց Արտեմ Ասատրյանը: 

Վարչապետ Հովիկ Աբրահամյանն էլ ասաց, որ այս ուսումնասիրության արդյունքների շրջանակներում նախապատրաստել են վարչապետի մի շարք հանձնարարակններ, որոնք գրավոր կուղարկվեն բոլոր նախարարություններին: