Ձեր վստահելի աղբյուրը

«Իրավիճակը շատ լուրջ է, առաջիկա ամիսները վճռորոշ են լինելու Լեռնային Ղարաբաղի, Հայաստանի համար: Արտաքին մեծ ճնշումներ կան, պատերազմը չի դադարում», -այսօր խորհրդարանական ճեպազրույցներում հայտարարեց ԱԺ ՀԱԿ խմբակցության ղեկավար Լևոն Զուրաբյանը:

Նրա խոսքով, այդքանով հանդերձ իշխանությունը չի հասկանում՝ ինչ է կատարվում և մտել է «շատ մանր քաղաքական, նեղ կուսակցական խաղերի մեջ»:

Միասնական լինելը, ըստ Զուրաբյանի, պետք է երևա գործով, իսկ գործը չի երևում:

«Տպավորություն է ստեղծվում որ և իշխանությունները, և շատ քաղաքական ուժեր լուծվում է ոչ թե իրենց քաղաքական գոյության հարցը, այլ Լեռնային Ղարաբաղի գոյության հարցը: Այս գիտակցությունը, կարծես, չկա և հնչում են ինչ-որ մեղադրանքներ, ինչ-որ աճպարարություններ», -հայտարարեց Զուրաբյանը՝ ընդգծելով, որ իշխանություններին ու ընդդիմությանն ուղղված երկու ուղերձ ունի:

Իշխանությանն ուղղված ուղերձով Զուրաբյանը նկատեց, որ ապրիլի 28-ին Ազգային ժողովում Ընտրական օրենսգրքի նախագծի քվեարկության ժամանակ նիստերի դահլիճում «խայտառակություն» կատարվեց:

«Այդպիսի քայլերով միասնականություն չեն ապահովում: Իշխանության վրա է հիմա պատասխանատվությունը, որ հանրությունը համարի իրեն մոբիլիզացված, որ համարի, որ բոլորը իրենց գործունեությունը ենթարկել են ամենակաչրևոր նպատակին՝ ազգային միասնականության նպատակին: Կոչ ենք անում սթափվել, հրաժարվել նման աճպարարություններից», -հայտարարեց Զուրաբյանը:

Պատգամավորը երկրորդ ուղերձն ուղղեց ընդդիմությանը. «Այն, ինչ կատարվեց երեկ, երբ ընդդիմությունը զբաղված էր փոխադարձ մեղադրանքներով, անընդունելի է: Իրական ընդդիմության միայն մեկ չափանիշ կա. իրական ընդդիմությունն այն ընդդիմությունն է, որն իր քննադատության թիրախ հաամրում է միմիայն իշխանություններին: Դուք երբևէ մեզ չեք տեսնի, որ զբաղվենք ընդդիմության կամ գոնե ձևական ընդդիմության քննադատությամբ»:

Նա ասաց, որ ապրիլի 2-ից հետո, երբ սահմանին ռազմական գործողություններ էին սկսվել, իրենք ավելի զուսպ են իշխանություններին ուղղված քննադատություններում:

«Եթե առաջ կարող էինք անխնա հարձակումների ենթարկել իշխանություններին, հիմա այդ ամենը տեղափոխվել է զուսպ քննադատության ոլորտ: Բայց մենք չենք մոռանում, որ մեր քննադատությունները, թեկուզ զուսպ, ուղղված են միայն իշխանություններին: Մեր թիրախը լինելու է և կա իշխանությունը», -հստակեցրեց Զուրաբյանը: