Ձեր վստահելի աղբյուրը

Հաշմանդամություն ունեցող անձանց աշխատանքի տեղավորման հարցում այս տարվանից որոշակի դեր են ունենալու նաև պետական և մասնավոր հատվածի գործատուները: 2016 թվականից սկսած՝ բոլոր այն պետական կառույցները, որոնց աշխատողների քանակը գերազանցում է հարյուրը, պարտավոր են աշխատատեղերի առնվազն 3 տոկոսում ընդգրկել հաշմանդամություն ունեցող անձանց: Այս մասին հայտնում են ԿՀԻԿ հիմնադրամի մամուլի ծառայությունից:

Մասնավոր հատվածի կառույցներին քվոտավորման պահանջը կվերաբերի 2017 թվականից. hարյուր և ավելի աշխատող ունեցող ընկերությունները իրենց կողմից առաջարկվող աշխատատեղերի առնվազն մեկ տոկոսում կընդգրկեն հաշմանդամություն ունեցող անձանց:

Հայաստանի Կառավարությունը, հաշմանդամություն ունեցող անձանց սոցիալական պաշտպանությանն ուղղված քաղաքականության շրջանակներում, արդեն այս տարվանից կիրառում է հատուկ ծրագիր, որի նպատակն է հաշմանդամություն ունեցող անձանց աշխատանքի տեղավորման աջակցություն ստանալ անմիջապես գործատուներից: Կառավարության որոշման համաձայն՝ պետական և մասնավոր հատվածի գործատուները, քվոտայի պահանջի չկատարման դեպքում կկատարեն համապատասխան մասհանումներ, որոնք դարձյալ կուղղվեն հաշմանդամություն ունեցող անձանց որոշակի խնդիրների լուծմանը:

Պետական կազմակերպությունների համար այս պահանջը արդեն իսկ ուժի մեջ է մտել. 100 և ավելի աշխատակից ունեցող կառույցները պարտավորվում են իրենց աշխատատեղերի 3 տոկոսում ընդգրկել հաշմանդամություն ունեցող անձանց: Մասնավոր հատվածի գործատուներին կարգը կվերաբերի հաջորդ տարվանից սկսած. 100 և ավելի աշխտող ունեցող մասնավոր ընկերությունները իրենց աշխատատեղերի մեկ տոկոսում պետք է ընդգրկեն հաշմանդամություն ունեցող անձանց:   

Նշված պահանջը չկատարելու դեպքում ընկերությունները կկատարեն մասհանումներ հատուկ նպատակով բացված հաշվեհամարին՝ քվոտայի պահանջը չկատարած յուրաքանչյուր աշխատատեղի համար՝ նվազագույն աշխատավարձի երեքհարյուրապատիկի չափով:

Այս մասհանումները նպատակային միջոցներ են և օգտագործվելու են երկու ուղղություններով՝ հաշմանդամություն ունեցող անձանց աշխատանքի տեղավորում, աշխատանքային և մասնագիտական վերականգնում, և հաշմանդամություն ունեցող անձանց առողջական և սոցիալական վերականգնում:  

Որպեզսի ընկերությունները տեղեկանան՝ արդյոք իրենք տվյալ տարվա կտրվածքով ենթակա են նշված կարգի պարտադիր ապահովմանը, պետք է ծանոթանան այս մասին պաշտոնապես հրապարակվող տեղեկատվությանը ՀՀ աշխատանքի և սոցիալական հարցերի նախարարության պաշտոնական կայք-էջում: 

Ընկերությունենրի ցանկերը պարբերաբար թարմացվելու են՝ ՀՀ ֆինանասների նախարարությունից ստացված համապատասխան տեղեկատվության հիման վրա:

Այսպիսով, պետական կազմակերպությունները, որոնց այս պահանջը վերաբերում է արդեն այս տարի, կարող են նախարարության կայքից տեղեկանալ` արդյոք իրենք ընդգրկված են 100 և ավելի աշխատող ունեցող ընկերությունների ցանկում, հետևաբար 2016 թվականի ընթացքում արդեն իսկ պետք է ապահովեն նշված քվոտայի կատարումը:

Գործատուներին համապատասխան տեղեկատվություն ստանալու հարցում կաջակցի նաև սոցիալական ոլորտի թեժ գիծը՝ 114 անվճար հեռախոսահամարով: