Ձեր վստահելի աղբյուրը

Այսօր Շիրակի մարզի ընդհանուր իրավասության դատարանի արտագնա նիստում, որն անցկացվում է Գյումրիում տեղակայված ռուսական 102-րդ ռազմաբազայում, Ավետիսյանների սպանության մեջ մեղադրվող ռուս զինծառայող Վալերի Պերմյակովը խոսել է, պատասխանել է հարցերի:

«Aravot.am»-ի փոխանցմամբ, հարցերի մեծ մասին նա կամ հրաժարվել է պատասխանել, կամ ասել է՝ չեմ հիշում: Փաստաբաններից Միհրան Պողոսյանի  հարցին՝ «Եթե նման իրավիճակ ձեզ նկարագրեին, թե մի անձ սպանել է 7 անձի, որից 2-ը երեխա են, ի՞նչ գնահատական կտայիք», Պերմյակովը պատասխանել է. «Ես կասեի, որ նա երևի խելագար է: Բայց մի մտածեք, թե ես այդպիսին եմ, ես այդպիսին չեմ»: Նաև պնդել է, թե ինքը հոգեկան որևէ խնդիր չունի:

Փաստաբանները ամբաստանյալից հետաքրքրվել են՝ երբ երեխաների առաջ կանգնած սպանում էր նրանց, չէ՞ր խղճում: Պերմյակովն ի պատասխան ասել է, որ չի հիշում նման բան: Հարցին՝ իսկ չի՞ զղջում, պատասխանել է՝ այո: Փաստաբանի հարցին՝ ինչո՞ւ ես զղջում, որ մա՞րդ ես սպանել, թե՞ որ անազատության մեջ ես հայտնվել, Պերմյակովը արձագանքել է. «Ամեն ինչի համար»:

Փաստաբանները հետաքրքրվել են՝ եթե ժամանակը շրջելու հնարավորություն ունենար ամբաստանյալը, ի՞նչ կաներ, Պերմյակովը պատասխանել է, թե ինքը նման իրավիճոկւմ չէր հայտնվի:

Հարցին՝ ի՞նչ է փոխվել հիմա, որ չի ուզում հայտնվել նման իրավիճակում, Պերմյակովը արձագանքել է. «Չեմ պատասխանի»:

«Արմենպրես»-ն իր հերթին տեղեկացնում է, որ այսօր դատական նիստում  հրապարակվել են նաև Պերմյակովի նախաքննական ցուցմունքները, քանի որ մինչ այդ ամբաստանյալը հրաժարվել էր դատարանում ցուցմունք տալ:

Ըստ աղբյուրի, այս անգամ ևս Պերմյակովի ցուցմունքների մեջ անհամապատասխանություններ կային. ըստ ԴՆԹ փորձաքննության արդյունքների` Պերմյակովի ինքնաձիգի վրա հայտնաբերվել է Սերյոժա Ավետիսյանի մատնահետքը, Սերյոժա Ավետսյանի դիակի վրա վզի շրջանում հայտնաբերվել են նաև քերծվածքներ, որը վկայում է այն մասին, որ Պերմյակովը կրակելու ժամանակ շատ մոտ է գտնվել:

Մեղադրյալը, սակայն, հարցաքննության ժամանակ նշել է, որ կրակելու ժամանակ շատ հեռու է կանգնած եղել, և Սերյոժա Ավետիսյանը չի փորձել բռնել ինքնաձիգը:

Մեկ այլ ցուցմունքի ժամանակ հարց է հնչել նախկին ցուցմունքներում նշած տաքսու վարորդի մասին, Պերմյակովը հերթական ցուցմունքի ժամանակ նշել է, որ նման բան չի եղել և ինքը չի զանգել ոչ մի տաքսու վարորդի ու ոչ մի բան չի պատվիրել: «Չեմ կարող ասել` ինչու եմ այդպես ասել», -եղել է Պերմյակովի պատասխանը:

Հրապարակվել են նաև ցուցմունքներ Պերմյակովի մոտ հայտնաբերված բջջայինների, մուտքային ու ելքային զանգերի վերաբերյալ: Մեկ այլ հարցաքննության ժամանակ քննիչի այն հարցին, թե ինչու է Պերմյակովը սպանել փոքրահասակ երեխաներին, Պերմյակովը պատասխանել է.

«Աղմուկ էր, երեխաները լաց էին լինում, դրսում շները հաչում էին, սպանեցի, որ այդ աղմուկը դադարի», - նշել է Պերմյակովը: Հակասություններ եղել են նաև երեխաների սպանության հետ կապված հարցաքննությունների ժամանակ:

Այսօրվա նիստին հրապարակվել են ամբաստանյալի բոլոր նախաքննկան ցուցմունքները:

Հիշեցնենք՝ Պերմյակովը մեղադրվում է գյումրեցի Ավետիսյանների ընտանիքի 7 անդամների սպանության մեջ: Սպանությունը կատարելուց հետո նա իր զինվորական հագուստը թողել էր Ավետիսյանների տանը և դուրս եկել տնից, շարժվել դեպի հայ-թուրքական սահման: Ռուս սահմանապահները հայտնաբերել են հայ-թուրքական սահմանը հատելու փորձ կատարելիս և հանձնել 102-րդ ռուսական բազայի հրամանատարությանը: Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը):