Ձեր վստահելի աղբյուրը

«Ընտանեկան բռնության զոհ դարձած կանանց տրամադրվող ծառայությունների բարելավում» դրամաշնորհային ծրագրի շրջանակներում գնումներն իրականացվել են «Գնումների մասին» ՀՀ օրենքի պահանջների խախտումներով: Նման եզրակացության է եկել Վերահսկիչ պալատը՝ այդ ծրագրի իրականացման վերաբերյալ ստուգումներ կատարելու արդյունքում:

Հաշվետվության մեջ նշվում է, որ ծրագիրն իրականացրել է «Աշխատանքի և սոցիալական հետազոտությունների ազգային ինստիտուտ» ՊՈԱԿ-ը: Այդ նպատակով վերջինս ԱՄՆ Միջազգային զարգացման գործակալությունից ստացել է 24,311.0 հազ. դրամ:

Ծրագրի ակնկալվող արդյունքներն են ՀՀ տարածքում ընտանեկան բռնության ենթարկված կանանց տրամադրվող գույքագրված ծառայություններ, ընտանեկան բռնության ենթարկված կանանց պաշտպանության ու տրամադրվող ծառայությունների բարելավման և հզորացման նպատակով մշակված առաջարկությունների փաթեթ, ընտանեկան բռնության ենթարկված կանանց համար մշակված իրավական նորմեր և ուղղորդման կարգ:

ՎՊ-ն որպես թերություն նշում է. «Ծրագրի շրջանակներում հարցազրուցավարների, փորձագետների կողմից մատուցված ծառայությունների կատարման փաստը հիմնավորող փաստաթղթերը թերի են և մասնակի (պարզ չէ, թե յուրաքանչյուր անձ տվյալ ամսում քանի խորացված, փորձագիտական հարցազրույցներ է անցկացրել և քանի ֆոկուս խմբի է մասնակցել)»:

Վերահսկիչ պալատը նաև ֆինանսական բնույթի խախատումներ է հայտանաբերել: ՄԱսնավորապես նշվում է. «30 փորձագիտական հարցազրույցը կարժենար 240.0 հազ. դրամ, սակայն փաստացի ծախսվել է 864.0 հազ.  դրամ: Արդյունքում  1,878.0 հազ. դրամը ավելի է ծախսվել»:

ՎՊ նշած մեկ այլ խախատում վերաբերում է տաքսի ծառայություններից օգտվելուն.  ««Յանց սերվիս» ՍՊԸ-ին վճարվել է 2.395.8 հազ. դրամ: Սակայն,  վերահսկողությամբ պարզվեց, որ հարցազրուցավարները որոշ մարզեր գնալիս  չեն օգտվել  «Յանց սերվիս» ՍՊԸ-ի ծառայություններից, այն է՝  տվյալ մարզեր գնացել են պատահական տաքսիներով: Արդյունքում  «Յանց սերվիս» ՍՊԸ-ին  վճարած 1,919.5 հազ. դրամը ենթակա է վերականգնման ՀՀ պետբյուջե»:

Պալատը հաշվետվության մեջ նաև նշում է, որ ծրագրի  վերջնական  հաշվետվության ուսումնասիրությունից պարզվել է, որ   հաշվետվությունում բացակայում է ընտանեկան բռնության ենթարկված կանանց համար մշակված  իրավական նորմերը, այնինչ  11 ֆոկուս խմբի և 30 փորձագիտական հարցազրույցների  փոխարեն կատարվել է 44 ֆոկուս խումբ և 108 փորձագիտական հարցազրույց, որի հետևանքով 658.0 հազ. դրամի փոխարեն փաստացի ծախսվել է 2,536.0 հազ. դրամ: Արդյունքում  1,878.0 հազ. դրամը ավելի է ծախսվել:

Նշվում է, որ վերահսկողության արդյունքների կապակցությամբ ՀՀ աշխատանքի և սոցիալական հարցերի նախարարությունը, ՀՀ Արագածոտնի և Կոտայքի մարզպետարանները  Վերահսկիչ պալատին ներկայացրել են պաշտոնական գրություններ արձանագրված խախտումների վերացման, շտկման և վերադարձման ենթակա գումարների, ինչպես նաև հետագայում հնարավոր խախտումները բացառելուն ուղղված առաջարկությունների մասով տարվող աշխատանքների մասին:

ՀՀ Արագածոտնի և Կոտայքի մարզերում գործող ՍԾՏԳ-ների կողմից թույլ տրված խախտումների բնույթն ու ծավալները նկատի ունենալով, ինչպես նաև, հետագայում ոլորտում նմանատիպ խախտումները կանխարգելելու նպատակով, Վերահսկիչ պալատը 2016 թվականին նախատեսել է ստուգումներ անցկացնել նաև ՀՀ մյուս մարզերում: