Ձեր վստահելի աղբյուրը

Ֆրանսիացի Ֆրեդերիկ Դեզնարը դատի է տվել Interparfums օծանելիքի ընկերությանը՝ ձանձրալի աշխատանքի համար։  44-ամյա ֆրանսիացին 360 հազար եվրոյի փոխհատուցում է պահանջում:

The Daily Telegraph-ին հղում անելով Rosbalt.ru-ն գրում է, որ Դեզնարն ընկերությունում մենեջեր է աշխատել: Նա պնդում է, որ 2010-2014  թվականներին ղեկավարությունն  իրեն չի թույլատրել կատարել բոլոր պարտականությունները, դրա փոխարեն ստիպել են անել ամենաձանձրալի աշխատանքը: Նա հայտարարել է, որ այդպիսի աշխատանքի պատճառով նա մի շարք հիվանդություններ է ձեռք բերել՝  էպիլեպսիա, խոց, անքնություն և դեպրեսիա:

Կյանքի այդ շրջանը Դեզնարն անվանել է մղձավանջային և դժոխային:

«Ինձ համար ամոթալի էր գումար ստանալ ոչինչ չանելու դիմաց»,-ասել է նա:

Նրան աշխատանքից հեռացրել են 2014-ին, այն բանից հետո, երբ յոթ ամիս անց է կացրել հիվանդանոցում:

Դեզնարի փաստաբանը պնդում է, որ իր հաճախորդի ղեկավարը հատուկ է նրան ստիպել ձանձրալի աշխատանք կատարել, որպեսզի պատճառ ունենա աշխատակցին առանց փոխհատուցման հեռացնելու:

Ընկերության փաստաբանն էլ իր հերթին հայտարարել է, որ ֆրանսիացին չորս տարվա մեջ ոչ մի անգամ չի բողոքել, որ իր աշխատանքը ձանձրալի է, և եթե նա անելու ոչինչ չի ունեցել, ապա ինչու՞ չի ասել դրա մասին: