Ձեր վստահելի աղբյուրը

«Նաիրիտ»-ի 460 աշխատակիցներ մեկ շաբաթ առաջ ծանուցագիր են ստացել, որ հուլիսի 1-ից ազատվում են աշխատանքից: Այս մասին Panorama.am-ին հայտնեց  գործարանի արհմիության նախագահ Հրաչ Թադևոսյանը:

«Մեզ համար անսպասելի էր, որովհետև հունվար ամսին բոլորիս հետ մեկ տարով աշխատանքային պայմանագիր են ստորագրել: Աշխատանքից ազատելը հիմնավորված է Աշխատանքային օրենսգրքի 113 հոդվածի 1-ին մասով»,-ասաց Հ. Թադևոսյանը:

Նշենք, որ օրենքի հիշյալ հոդվածը սահմանում է. «Գործատուն իրավունք ունի լուծելու անորոշ ժամկետով կնքված աշխատանքային պայմանագիրը, ինչպես նաև որոշակի ժամկետով կնքված աշխատանքային պայմանագիրը՝ նախքան դրա գործողության ժամկետի լրանալը կազմակերպության լուծարման (անհատ ձեռնարկատիրոջ գործունեության դադարման) դեպքում»:

Թադևոսյանի խոսքով, հուլիսի 1-ից բոլորին կազատեն աշխատանքից, հետո մի մասին նորից աշխատանքին կընդունեն: Թե քանիսը կվերադառնան աշխատանքի, Թադևոսյանը տվյալներ չունի:

«Ադմինիստրացիան ամեն ինչ օրինական է անում, անօրինական բան չկա: Գործարանը տեղյակ է պահել զբաղվածության կենտրոններին, որ այս մասնագիտության տեր այսքան մարդ ազատվում է  աշխատանքից»,-ասաց նա:

Նա պայքարի իմաստ էլ չի տեսնում, եթե գործարանը չի աշխատելու. «Կարող է մինչև հուլիսի 1-ը իրավիճակ փոխվի: Որքանով ես եմ տեղեկացված՝ մայիս-հունիս ամիսներին կառավարությունը պետք է Նաիրիտի հարցը քննարկի»:

Հիշեցնենք, որ գործարանի աշխատակիցները երկարատև պայքարից հետո ստացան աշխատավարձերը: Հետո ամենշաբաթյա բողոքի ակցիաների մասնակիցները սկսեցին պահանջել  «Նաիրիտի վերագործարկում»: