Ձեր վստահելի աղբյուրը

«Պարենային անվտանգության ապահովման» մասին օրենքն ասում է, որ Հայաստանը պետք է դառնա ինքնաբավ երկիր:  Սակայն այս ուղղությամբ քայլեր չեն իրականացվում: Նման տեսակետ հայտնեց տնտեսագետ Աշոտ Խուրշուդյանը, ով «Մեդիա կենտրոն»-ում  մասնակցում էր «Ի՞նչ հետևանքներ կունենա Թուրքիայից Հայաստան ապրանքների ներմուծման հնարավոր սահմանափակումը» թեմայով քննարկմանը:

«Օրենքում գրված է  մի շատ գեղեցիկ հեքիաթ, որը իրականացնելու համար անհրաժեշտ է գյուղատնտեսական քաղաքականություն, որը բառիս բուն իմաստով չունենք»,-ասաց Ա. Խուրշուդյանը:

Նա կարծում է, որ այսօր գյուղատնտեսության ոլորտը թողնված է ինքնահոսի, ինչի արդյունքում Արմավիրի ու Արարատի մարզերում այն զարգանում է, իսկ մյուսներում՝ չկա:

«Այս իրավիճակում եթե թուրքական ապրանքները արգելենք, ապա բան չի փոխվի: Ոչ թե խնդիրն այն է, որ Թուրքիայից էժան կամ անորակ բանջարեղեն է գալիս, այլ այն, որ այստեղ ընդհանրապես քաղաքականություն չկա, իրագործում չկա: Չենք բերի թուրքականը, կբերենք պարսկականը»,-ասաց նա: