Ձեր վստահելի աղբյուրը

ԱԺ Պատգամավոր Տիգրան Ուրիխանյանի գրասենյակը տարածել է հայտարարություն «Analitik.am» կայքի  սեփականատեր Ա. Հովհաննիսյանի  ձերբակալության և հարուցված  քրեական գործի վերաբերյալ:

Հայտարարության մեջ մասնավորապես ասված է.

«Պատգամավոր Ուրիխանյանը  համոզված է, որ, առհասարակ, ցանկացած  հանցագործ պիտի կրի օրենքով սահմանված պատիժը, իսկ ցանկացած անմեղ  մարդ պետք  է  օգտվի  իր  իրավունքների  պաշտպանությունից: Հայտնում ենք, որ պատգամավոր Ուրիխանյանի կենսագրությունը մաքուր է, և նա այն անձը չէ, ում կարելի է փորձել շորթել, սակայն պատգամավորը, գիտակցելով, որ  սանձարձակ անձնավորությունը իգական սեռի է, և հուսալով, որ  նա  կարող է երբևէ դարձի գալ ու  ապրել բարոյական կյանքով, չի պատրաստվում  ցուցմունքներ տալ  նրա դեմ, առավելևս  նրա օգնականի դեմ, որն իր հերթին, վստահ ենք` Անի Հովհաննիսյանի «քաշվածն է»: Թող օրենքը որոշի հետագա ընթացքը»:

Քննչական կոմիտեից ավելի վաղ Panorama.am-ին հայտնել էին, որ «Analitik.am» լրատվական կայքի պատասխանատու Ա. Հովհաննիսյանի և նրա օգնական Վարդիթեր Գ.-ի կողմից գումար շորթելու դեպքով քրեական գործ է հարուցվել՝  Քրեկան օրենսգրքի 182-րդ հոդվածի 2-րդ մասի 2-րդ կետի հատկանիշներով՝ «մի խումբ անձանց կողմից նախնական համաձայնությամբ կատարված շորթումը»:

Նաև տեղեկացրել են, որ առայժմ ձերբակալվածներին մեղադրանք չի առաջադրվել: