Ձեր վստահելի աղբյուրը

Գյուղատնտեսության փոխնախարար Գառնիկ Պետրոսյանի խոսքով, ցրտահարության հետևանքով այս տարի կունենանք ավելի քիչ, բայց ավելի որակյալ ծիրան:

«Ընդհանրապես` եթե պտղատու ծառերն  ավելի քիչ ծանրաբեռվածություն ունեն, որպես կանոն ձևավորվում են ավելի խոշոր պտուղներ: Ծառատեսակների մոտ կա ինքնակարգավորման երևույթ, երբ շատ է պտուղների քանակը, դրանք մնում են ավելի փոքր և ցածր ապրանքային տեսքով, և հակառակը»,-Panorama.am-ի հետ զրույցում ասաց փոխնախարարը:

Պետրոսյանի ներկայացմամբ, եթե նախկինում 100 տոննայից ընդամենը 50 կամ 60 տոննան կարող էր շուկայահանվել, առավել ևս արտահանվել հանրապետությունից, ապա հիմա դա կարող է լինել 70-80 կամ ավելի բարձր տոկոսով:

«Հիմա մենք դիտարկումներ ենք կատարում: Ծիրանենու պտուղները շատ ավելի լավ վիճակում են՝ և խոշոր են, և զերծ հիվանդություններից: Այս պահի դրությամբ ունենք շատ մաքուր ու որակյալ պտուղներ ստանալու ակնկալիք»,-արդյունքները ներկայացրեց նախարարության պաշտոնյան:
Առողջ բերք ստանալուն նպաստել են նաև բնակլիմայական պայմաններն ու պտղաբույծների աչալրջությունը:

Հիշեցնենք, որ գյուղատնտեսության նախարարությունից ավելի վաղ տեղեկացրել էին, որ հանրապետությունում 2016 թվականին կանխատեսվում է 45-55 հազար տոննա ծիրանի բերք: Համեմատության համար նշենք, որ 2015-ին Հայաստանում գրանցվել է ծիրանի 116 հազար տոննա բերք:

ԳՆ-ից նաև հայտնել էին, որ ծիրանի ընթացիկ տարվա սպասվող բերքի վերաբերյալ առավել հստակ տեղեկություններ կտրվեն մայիսի երկրորդ տասնօրյակին: