Ձեր վստահելի աղբյուրը

Ակնհայտ է, որ գազի սակագնի իջեցումը դրական ազդեցություն կունենա տնտեսության վրա: Այս մասին այսօր լրագրողների հետ զրույցում ասաց ՀՀ էկոնոմիկայի նախարար Արծվիկ Մինասյանը:

«Իհարկե դրական ազդեցության ծավալը կամ մակարդակը կախված է նաև իջեցման չափից և այն ոլորտներից, որտեղ գազի գնի նվազեցումը առաջին հերթին ազդեցություն ունենա»,- նշեց նա:

Արծվիկ Մինասյանի խոսքերով՝  գազի սակագնի իջեցումը նաև բերելու է  էլեկտրաէներգիայի սակագնի իջեցման, դա էլ իր հերթին կբերի ինքնարժեքի նվազեցմանը և մեր ապրանքների մրցունակության բարձրացմանը:

«Բնական է, որ ապրանքների գների վրա նույնպես ազդեցություն կունենա, քանի որ  եթե խոսում ենք ավելի ցածր ինքնարժեքի և շուկայում մրցակցային միջավայրի ձևավորման մասին, ակնհայտ է, որ դա կբերի գների որոշակի իջեցման»,- ընդգծեց նախարարը:

Ըստ նրա՝ էկոնոմիկայի նախարարությունը ներկայում ուսումնասիրություններ է  իրականացնում, որոնց արդյունքները կփոխանցի մյուս գերատեսչություններին և իրավասու մարմիններին, որպեսզի տնտեսության մեջ ընտրեն այնպիսի թիրախներ, որոնք կապահովեն այդ իջեցումից առավելագույն ելքային արդյունք թե աշխատատեղերի, թե նաև թողարկվող ապրանքների ստեղծման ուղղությամբ: