Ձեր վստահելի աղբյուրը

Քաղաքական ակտիվիստ Գևորգ Սաֆարյանի գործով նախաքննությունն ավարտվել է, և քրեական գործն ուղարկվել է Կենտրոն և Նորք Մարաշ վարչական շրջանների ընդհանուր իրավասության դատարան: Ընդդիմադիր ակտիվիստի վերաբերյալ քրեական գործը գտնվում է դատավոր Մնացական Մարտիրոսյանի վարույթում:

Սաֆարյանի փաստաբան Տիգրան Հայրապետյանը Panorama.am-ի թղթակցի հետ զրույցում տեղեկացրեց, որ դատական նիստի մեկնարկին իրենք պատրաստվում են բացարկ հայտնել դատավորին:

«Այս գործը Մնացական Մարտիրոսյանի մոտ չպետք է ընկներ, քանի որ Մնացական Մարտիրոսյանն այս հարցով կանխակալ վերաբերմունք ունի», -նշեց փաստաբանը:

Նրա խոսքով, դեռ նախաքննության փուլում Գևորգ Սաֆարյանի կալանքի վերաբերյալ հարցերով 4 անգամ նա կայացրել է որոշումներ, որոնց համաձայն խախտումներ չկան, մինչդեռ պաշտպանական կողմի կարծիքով դրանք եղել են անհիմն:

Փաստաբանը նաև ասաց, որ Մնացական Մարտիրոսյանը, որը նաև Դատավորների էթիկայի հանձնաժողովի նախագահն է, աչք է փակել գործընկեր դատավոր Գագիկ Խանդանյանի «կոպիտ սխալի վրա»:

«Այդ դատավորը ակնհայտ կեղծել էր միջազգային պայմանագիրը և գոյություն չունեցող պայմանագրի վրա էր հղում կատարել՝ նշելով, որ Գևորգին պետք է կալանավորել այդ պայմանագրի այդ կետի հիման վրա: Դատական ատյաններում մեր բոլոր բողոքները անտեսվեցին, իսկ Դատավորների էթիկայի հանձնաժողովում Մնացական Մարտիրոսյանը գտել էր, որ խախտումներ չեն եղել», -ներկայացրեց փաստաբանը:

Բացի այդ, ըստ մեր զրուցակցի, Սաֆարյանի՝  կալանքի վերաբերյալ ներկայացրած ոչ մի բողոքի մերժում չի պատճառաբանվել ու չի հիմնավորվել:

«Դատավորը թագավոր չէ, որ ասի՝ ես ուզում եմ այդպես, ուրեմն այդպես էլ պետք է լինի: Կա քրեական դատավարության օրենսգիրք, որը կարգավորում է, թե ինչպես պետք է դատավորը արդարադատություն իրականացնի. Որոշման մեջ պետք է մանրամասն արձագանք լինի բողոքի հիմնական կետերին, դրանց վերաբերյալ դատարանի դիրքորոշումը պետք է լինի, եթե դատարանը մերժում է բողոքի հիմքերը, ապա պետք է պատճառաբանություն լինի: Մնացական Մարտիրոսյանը նույնն է արել. չորս անգամ որոշում է կայացրել, մերժել է Սաֆարյանի բոլոր բողոքները, Սաֆարյանի դեմ որոշում կայացրած բոլոր դատավորներին արդարացրել է, բայց կես նախադասությամբչի հիմնավորել իր որոշումները: Ակնհայտ է, որ նման դատավորները Հայաստանի Հանրապետության անունից չպետք է դատական ակտեր կայացնեն», -ներկայացրեց Հայրապետյանը:

Նշենք, որ դեռ հայտնի չէ Սաֆարյանի գործով դատական նիստի օրը:

Սաֆարյանին մեղադրանքն առաջադրվել է ՀՀ Քրեական օրենսգրքի 316 հոդվածի 1-ին մասի հատկանիշներով. «Իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը»: