Ձեր վստահելի աղբյուրը

Այսօր իրավիճակը առաջնային գծում լարված է և ցանկացած ժամանակ, ցանկացած գործողություններ կարող են լինել: Այդ մասին այսօր խորհրդարանական փակ քննարկումից հետո լրագրողների հետ ճեպազրույցում հայտարարեց Պաշտպանության նախարար Սեյրան Օհանյանը :

«Հայկական բանակը, հանձինս Լեռնային Ղարաբաղի Հանրապետության Պաշտպանության բանակի, այսօր իր առջև դրված խնդիրները իրականացնում է բարձր մակարդակով, այն ծավալված է, պատրաստ է պաշտպանողական և այլ խնդիրների իրականացմանը», -հավելեց նախարարը:

Անդրադառնալով սպառազինության հարցին և մասնավորապես, Ռուսաստանից սպասվող զինտեխնիկային, Օհանյանը նկատեց, որ այդ «համապատասխան աշխատանքներ են տարվում ռազմատեխնիկական համագործակցության շրջանակներում մեր տեմպերի արագացման ուղղությամբ»:

Լրագրողը հետաքրքրվեց, թե ինչպես է վերաբերվում կառավարության նիստում վաղը քննարկվելիք Արցախի ճանաչման մասին պատգամավորների ներկայացրած օրինագծին, Պաշտպանության նախարարը նախ ասաց, թե տեղյակ չէ, թե ինչ նախագծի մասին է խոսքը, հետո երբ լրագրողը պնդեց հարցը, Օհանայանը պատասխանեց. «Ես միշտ էլ ճանաչում եմ իմ հայրենիքը»:

Հարցին, թե անորոշություն է, ի ՞նչ կարելի է սպասել, Օհանյանը պատասխանեց. «Այսօր ժամանակավոր հրադադար է»: