Ձեր վստահելի աղբյուրը

Արցախի անկախությունը ճանաչելու մասին նախագիծը, որը այսօր հաստատվել է կառավարության նիստում, Ազգային ժողովի արտահերթ նիստ գումարելու վերաբերյալ ՀՀ կառավարության նախաձեռնության որոշման մեջ ընդգրկված չէ: Այդ մասին Panorama.am-ին տեղեկացրեց վարչապետի մամուլի խոսնակ Գոհար Պողոսյանը:

Նշենք, որ ռուսական որոշ աղբյուրներ տեղեկացրել էին, թե օրինագիծը ենթադրվում է՝ կներառվի մայիսի 10-ին գումարվելիք Ազգային ժողովի արտահերթ նիստի օրակարգ:

Հայաստանի Ազգային ժողովում կառավարության ներկայացրած օրինագծերը նախ քննարկվում են գլխադասային հանձնաժողովում, այնուհետև հանձնաժողովի որոշմամբ կամ դրական եզրակացությամբ ընդգրկվում լիագումար նիստի օրակարգ, կամ հետաձգվում:

Օրինագիծը կառավարությանը ներկայացրել էին ԱԺ պատգամավորներ Հրանտ Բագրատյանը և Զարուհի Փոստանջյանը:

Այն ունի ընդամենը երկու հոդված

Հոդված 1. Հայաստանի Հանրապետությունը ճանաչում է Արցախի Հանրապետությունը:

Հոդված 2. Սույն օրենքն ուժի մեջ է մտնում պաշտոնական հրապարակման օրվան հաջորդող օրը:

Պատգամավորների հիմնավորմամբ, օրենքի նախագծի ընդունմամբ Հայաստանի Հանրապետության կողմից իրավամբ կճանաչվի Արցախի փաստացի կարգավիճակը` ելնելով նրանից, որ Արցախի Հանրապետությունը բավարարում է ինքնիշխան պետության համար միջազգային օրենքի բոլոր նախապայմաններին:

«Օրենքը հիմք կհանդիսանա Հայաստանի և Արցախի հանրապետությունների` Արցախի Հանրապետության պաշտոնական ճանաչումից ծագող հարաբերությունները կարգավորելու, Արցախի անվտանգությունն ապահովելու և ամրապնդելու գործում ՀՀ իրավունքներն ու պարտականությունները որոշակիացնելու, Հայաստանի ազգային շահն ու պետական քաղաքականությունը սահմանելու, հետհակամարտյան վերականգնման աշխատանքներին Հայաստանի մասնակցության համար», -նշված է պատգամավորների հիմնավորման մեջ: