Ձեր վստահելի աղբյուրը

Բրիտանական առաջատար BBC հեռուստաընկերության էլեկտրոնային ռեսուրսում լույս տեսած հերթական հրապարակումը  կրկին բացահայտում է, որ Ադրբեջանը փորձում է մոլորեցնել միջազգային հանրությանը:

Խնդրո առարկա հրապարակումից՝ վերնագրված «Հակամարտությունը Լեռնային Ղարաբաղում. Կյանքը ճակատային գծում», պարզ է դառնում, որ Ադրբեջանի ռազմա-քաղաքական ղեկավարությունը հետևողականորեն թաքցնում է այն իրողությունը, որ սադրիչ նպատակներով ռազմական օբյեկտները տեղակայում է քաղաքացիական բնակավայրերում:

Մասնավորապես՝ դեռ այս տարվա ապրիլի 28-ին ԼՂՀ ՊՆ-ն հայտարարություն  էր տարածել այն մասին, որ Ադրբեջանը, կոպտորեն խախտելով միջազգային մարդասիրական իրավունքի նորմերը, ռազմական օբյեկտները տեղակայում է քաղաքացիական բնակավայրերում կամ դրանց մերձակա վայրերում, որպեսզի ի լուր աշխարհի հայտարարի, որ հայկական կողմը թիրախավորում է քաղաքացիական բնակչությանը: Նկատենք, որ ԼՂՀ ՊՆ-ն հայտարարությանը կից նաև ներկայացրել էր լուսանկարներ, որոնցից ակնհայտորեն երևում է, որ ադրբեջանական ռազմական մի շարք օբյեկտներ տեղակայված են քաղաքացիական բնակավայրերում:

Բաքուն հերքեց վերը նշված հայտարարության մեջ ներկայացված փաստերի իսկությունը, հակառակն ապացուցող որևէ փաստ չներկայացնելով: Սակայն, ինչպես երևում է BBC-ի հրապարակումից, Բաքվում, իսկապես, ռազմական օբյեկտների տեղակայման վայրերի հետ կապված աշխարհից թաքցնելու բան ունեն:

Հրապարակման մեջ այդ կապակցությամբ լրագրողը մասնավորապես գրում է. «չնայած իսկզբանե մեզ խոստացել էին, բայց այդպես էլ մեր նկարահանող խումբը հնարավորություն չստացավ տեսնելու և համոզվելու, թե որտեղ են տեղակայված ռազմական օբյեկտները՝ Ադրբեջանի պաշտպանության նախարարության մերժման պատճառով: Մերժումը պատճառաբանեցին իբև մեր անվտանգության ապահովման նկատառումներից ելնելով»:

Ընդ որում, ինչպես BBC-ի նախորդ հրապարակման , այնպես էլ այս հրապարակման մեջ, լրագրողը շեշտում է, որ իրենց այցը զգուշորեն կազմակերպված էր Բաքի իշխանությունների կողմից և որ ողջ ընթացքում իրենց ուղեկցել են տարբեր պաշտոնյաներ: Այսինքն, սահմանափակվել է ոչ միայն լրագրողների ազատ տեղաշարժման իրավունքը, այլ նաև Ադրբեջանի իշխանությունները հոգ են տարել այն մասին, որ սահմանային բնակավայրերի քաղաքացիների և լրագրողների շփումը ևս իրականացվի իրենց հսկողությամբ:

Այս կապակցությամբ, լրագրողը նշում է, թեև սահմանային բնակավայրերի բնակիչները գովեստի խոսքեր էին ասում իշխանություններին, սակայն «դժվար է ասել, թե որքանով էին նրանք անկեղծ, քանի որ խոսում էին պաշտոնյաների ներկայությամբ, իսկ մեր այցն էլ կազմակերպված էր իշխանությունների կողմից»:

BBC-ի լրագրողի աչքից նաև չի վրիպել Ադրբեջանի իշխանությունների ռազմական հռետորաբանության պտուղները, որքանով որ լրագրողը համոզվածություն է հայտնում. «բնակչության, այդ թվում ավագ սերնդի, ով ժամանակին հայերի հետ կողքի կողիքի է ապրել, շրջանում նկատելի է հայատյացության բավական ուժեղ դրսևորումներ:

Կնյազ Սարոյան, քաղաքագետ