«Հրազդան-ցեմենտ» ընկերությունը կապ չունի Միխայիլ Բաղդասարովի հետ. Արծվիկ Մինասյան

Հասարակություն 15:58 10/05/2016

«Հրազդան-ցեմենտ» ընկերությանը հարկային և պարտադիր սոցիալական ապահովագրության վճարների գծով առաջացած տույժերից ազատելու մասին» ՀՀ օրենքի նախագիծը արդեն չորրորդ անգամ է քննարկվում Ազգային ժողովում:

ՀՀ Էկոնոմիկայի նախարար Արծվիկ Մինասյանը հայտարարեց, որ «Հրազդան-ցեմենտ» ընկերության բաժնետերը «ՎՏԲ Հայաստան» Բանկն է, և օրինագծով առաջարկվում է ընկերությանը ազատել հարկերի ուշացման համար սահմանված կամ հաշվարկված տույժերից:

«Այս օրինագիծը հարկային արտոնություն տալու մասին չէ, այլ հարկերի ուշացման համար սահմանված տույժերից ազատելու մասին է: Սա հնարավորություն է, որ գործարանը չլիկվիդացվի և այսպիսով փորձ է արվում պահպանել չորս հարյուր հիսուն աշխատատեղ: Այս արտոնությունը տրվում է գործարանին, որպեսզի պահպանվի գործարանը, որպեսզի ՀՀ այս ոլորտը հանկարծ չհայտնվի վատ վիճակում», -ներկայացրեց նախարար Մինասյանը:

Պատասխանելով պատգամավոր Տիգրան Ուրիխանյանի հարցին, Մինասյանը վստահեցրեց, որ «Հրազդան-ցեմենտ» ընկերությունը կապ չունի Միխայիլ Բաղդասարովի հետ:

«Մեր տրամադրվածությունը որևէ անձի պատասխանտվությունից ազատելու նպատակ չի հետապնդում: Մեր նպատակը մեկ բան է` պահպանել «Հրազդան-ցեմենտ»-ը, հնարավորություն տանք մարդկանց աշխատել», -հավելեց Մինասյանը:

Նշենք, որ այս օրինագիծը ԱԺ նախորդ քառօրյա նիստում տապալվել էր, և քվեարկությունը տեղի չէր ունեցել, ինչը մեծ իրարանցում էր առաջացրել ՀՀԿ վերնախավում: Կառավարությունը մայիսի 5-ին տեղի ունեցած նիստում հաստատել էր նախագիծը և հերթական անգամ ուղարկել Ազգային ժողով` արտահերթ նիստում քննարկելու համար:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: