Ձեր վստահելի աղբյուրը

Ազգային ժողովի Դաշնակցություն խմբակցության ղեկավար Արմեն Ռուստամյանը վստահում է ՀՀ նախկին վարչապետ, ԱԺ պատգամավոր Հրանտ Բագրատյանին:

«Եթե Հրանտ Բագրատյանի նման լուրջ մարդը բաներ է ասում, ուրեմն մի բան գիտի, նա եղել է վարչապետ, տիրապետում է լուրջ ինֆորմացիայի, որը կարող է հասանելի չլինել բոլորին: Այդ առումով հավատում եմ նրա խոսքերին», -այսօր Ազգային ժողովում լրագրողների հետ ճեպազրույցում հայտարարեց պատգամավոր Ռուստամյանը` մեկնաբանելով Բագրատյանի հայտարարությունը:

Հիշեցնենք` ավելի վաղ Հրանտ Բագրատյանը մամուլի ասուլիսներից մեկում հայտարարել էր, թե՝ «Հայաստանում արդեն ստեղծված է միջուկային զենք», և բացի այդ՝  «Հայաստանն ունի հնարավորություն այն ստեղծելու համար»: Բագրատյանի այս հայտարարությունը արձագանք էր ստացել ԵՄ-ում, և Եվրոպական միության գերագույն հանձնակատար Ֆեդերիկա Մոգերինիի պաշտոնական ներկայացուցիչ Մայա Կոցյանչիչը բրյուսելում հայտարարել էր, թե պետք է ստուգեն այդ տեղեկությունը: «Ես պետք է ստուգեմ: Դուք գիտեք մեր դիրքորոշումը միջուկային զենքի ու դրա չտարածման հետ կապված: Դուք գիտեք մեր մոտեցումը, և դա շատ պարզ է», -ասել էր նա:

Արմեն Ռուստամյանը մտահոգիչ չի համարում եվրոպացիների կողմից հնարավոր ստուգումները:

«ԵՄ պատասխանատուները  իրենց կոչմանը համապատասխան թող արձագանքեն այն իրավիճակին, որն այսօր գոյություն ունի, երբ բոլորի աչքի առաջ Ադրբեջանը պատերազմական գործողություններ է իրականացնում, անընդհատ խոստանում է իր արսենալը մեծացնել էլ և դա, ըստ էության, ոչ միայն խոսքեր են այլ նաև գործ:Այսինքն, որևէ հիմք չկա այսօր մտածելու, որ նույն Ադրբեջանը Թուրքիայի հետ միասին նոր ավանտյուրա չեն սկսի: Այս անգամ շատ ավելի ծանր հետևանքներ կունենա, եթե փորձեն թեժացնել իրավիճակը, ավելի մեծ մասշտաբներ կունենա պատերազմը», -հավելեց Ռուստամյանը:

Լրագրողը հետաքրքրվեց, թե հնարավո՞ր է, որ ավելի վաղ է Հայաստանն ունեցել միջուկային զենք, հաշվի առնելով այն, որ պատգամավորը վկայակոչում է նախկին վարչապետի հայտարարությանը, Ռուստամյանը արձագանքեց. «Շատ հնարավոր է, ինչու ոչ, ի վերջո մենք եղել ենք միջուկային տերության մաս: Ինչպես է այդ ամենը բաշխվել, ինչ է կատարվել, շատ անհայտ պատմություններ կան: Երբ պարզվի, որ մենք ունենք միջուկային զենք, ոչ մի վտանգ էլ չենք ունենա»:

Դիտարկմանը, թե ԵՄ-ն է սկսել հետաքրքրվել, պատգամավորն արձագանքեց. «Թող ստուգեն, դա նրանց իրավունքն է: Թող նաև ստուգեն տարածաշրջանում բալանսը զենքի, թող սկսեն այդտեղից: Մենք ասում ենք` բալանսը շատ լրջորեն խախտված է տարածաշրջանում»:

Մյուս հարցին, թե այսինքն ՄԱԳԱՏԷ-ին հրավիրում են Հայաստա՞ն, պատգամավորը պատասխանեց. «Թող գան ստուգեն: Մենք վաղուց ենք ասել դա, իսկապես, տարածաշրջանում բալանսը պետք է պահպանվի: Ադրբեջանը բոլորի աչքի առաջ զինվում է, անթաքույց, և անընդհատ սպառնում է, փորձում է վախեցնել` կիրառելով անպիսի զինատեսակներ, որոնք, ըստ էության, արգելված են»:

Պատգամավորի խոսքով, Ադրբեջանը արդեն իսկ զանգվածային ոչնչացման նպատակով զենքեր է օգտագործում և անընդհատ դրանով սպառնում Հայաստանին` չունենալով դրա համար ոչ հիմք, ոչ էլ արտոնություն կամ հնարավորություն:

«Իսկ Հայաստանը պետք է ամեն պահի էլ մտածի իր պաշտպանությունն ամրացնելու մասին և բոլոր հնարավոր միջոցներով դա պետք է իրականացնի», -ասաց Ռուստամյանը: