Ձեր վստահելի աղբյուրը

Հայաստանը Լեռնային Ղարաբաղի անկախության և անվտանգության երաշխավորն է ու համարժեք քայլեր պետք է իրականացնի, ինչը ենթադրում է նաև չեզոքացնել այն ռազմական սպառնալիքը, որը Ադրբեջանը ներկայացնում է Արցախի ժողովրդի համար:

Այդ մասին այսօր լրագրողների հետ ճեպազրույցում հայտարարեց ԱԺ Դաշնակցություն խմբակցության ղեկավար Արմեն Ռուստամյանը:

Այդ համատեքստում, ըստ Ռուստամյանի, պետք է արագացնել Արցախի և Հայաստանի միջև ռազմական փոխօգնության պայմանագիրը, ինչի մասին ավելի վաղ հայտարարել էր Հայաստանի նախագահը:

«Հայաստանը շատ հստակ հայտարարել է, որ պատրաստում է ռազմական փոխօգնության պայմանագիր, որը իրերը պետք է կոչի իր անուններով. դե ֆակտո ստեղծված իրավիճակը պետք է պետք է դե յուրե ամրագրենք, ինչի մասին վաղուց խոսում ենք: Այսինքն` Հայաստանի զենքը, Հայաստանի ունեցած զինանոցը պետք է ծառայի Արցախի անվտանգության համար», -հավելեց պատգամավորը:

Հարցին, թե Ռուսաստանը թույլ կտա՞ որ Հայաստան մտնող զենքը կրակի Լեռնային Ղարաբաղում, Ռուստամյանը պատասխանեց. «Իսկ ի՞նչ է կրակում ձեր կարծիքով, հիմա Ղարաբաղում: Կարող է՞ Ադրբեջանի զենքն է, Հայաստանից գնացած զենք է և պետք է կրակի, բա ի՞նչ պետք է անի»:

Դիտարկմանը, թե Հայաստանը չի ճանաչել Արցախի անկախությունը, դաշնակցական պատգամավորը արձագանքեց, թե Հայաստանը չի ճանաչել Ղարաբաղը մի պարզ պատճառով` որ դա տեղի ունենա միջազգային գործընթացի միջոցով, այնուհետև հավելեց.

«Աշխատում է Մինսկի խումբ, և մենք դա ուզում ենք կատարել այդ խմբի միջոցով, ոչ թե միակողմանի ճանաչել: Դա մեծագույն զիջումն է, որ Ղարաբաղը չի ճանաչել, որպեսզի բանակցությունների միջոցով բոլորը համոզվեն, որ պետք է ճանաչվի Ղարաբաղը: Բայց եթե Ադրբեջանը բանակցություններ ասածը մտցնում է փակուղի, ըստ էության, դադարեցնում է բանակցությունները, ուրիշ ելք չի մնում, քան ճանաչել Ղարաբաղը:

Մենք ասում ենք` Ղարաբաղի ճանաչումը պետք է միշտ մնա մեր օրակարգում, բայց մինչ այդ պետք է ամեն ինչ հստակ լինելու համար կնքվի այդ պայմանագիրը, որտեղ հստակ պետք է երևա` հարձակում Ղարաբաղի վրա, նշանակում է հարձակում Հայաստանի վրա, իսկ Հայաստանը իր բոլոր միջոցներով պետք է պաշտպանվի:

Հայաստանը, եթե նայեք պատմությունը, երբեք սպառնալիք չի հանդիսացել, մեզանից երբեք պատերազմ չի սկսվել: Այդ մեզ են պատերազմ պարտադրել: Եվ հիմա խոսել, որ Հայաստանը սպառնալիք է հանդիսանում, ապա պետք է առաջին հերթին տեսնեն, թե ով է իրական սպառնալիքը այս տարածաշրջանում, դա թուրք-ադրբեջանական տանդեմն է:

Դա շատ հստակ է: Թող խոսեն այն մասին, թե ինչու են թուրքերը այսօր զորք կուտակում կուտակում Նախիջևանում, այսինքն իրենք պայթյունավտանգ իրավիճակ են ստեղծում` այս ամբողջ տարածաշրջանի տակ դնում են ական և հետո մեղադրում են որևէ մեկին, որն ուզում է պաշտպանվել դրանից»: