Ձեր վստահելի աղբյուրը

ՀՀ վարչապետ Հովիկ Աբրահամյանն այսօր լրագրողների հետ զրույցում ասաց, թե կառավարության անդամնեերի հետ նոր է վերադարձել Արցախի Հանրապետությունից, որտեղ գտնվում էր աշխատանքային այցով:

Նրա խոսքերով՝  այցի շրջանակներում  հանդիպում-քննարկումներ է ունեցել ինչպես նախագահի, այնպես էլ կառավարության անդամների հետ:

«Եղել ենք նաև առաջնագծում: Կարող եմ ասել, որ սկսած մեր զինվորներից, սպաներից, գեներալներից, Լեռնային Ղարաբաղի քաղաքական գործիչներից, պատգամավորներից,  բոլորի մոտ շատ հստակ, բարձր վստահութjուն կա մեր ապագա հաղթանակների համար: Դա  նաև մեզ ոգևորեց»,- ասաց վարչապետը:

Հովիկ Աբրահամյանը  նշեց, որ քննարկել են նաև տնտեսական խնդիրներ, և բոլոր հարցերի շուրջ ձեռք են բերվել պայմանավորվածություններ:

Ինչ վերաբերում է Արցախի Հանրապետության ճանաչման հարցին, Հովիկ Աբրահամյանն ասաց, թե հանրապետության Նախագահը շատ հստակ իր դիրքորոշումը հայտնել է, և եթե շարունակվեն այդ ոտնձգությունները և այդ պատերազմը, ապա Հայաստանը ստիպված կլինի գնալ այդ քայլին:

«Առայժմ դրա անհրաժեշտությունը չկա»,-ասաց վարչապետը:

Հարցին, թե փոխօգնության համաձայնագիրն ինչու է ուշանում, վարչապետը պատասխանեց. «Չի ուշանում, նախապատրաստական փուլում է»:

Հիշեցնենք, որ ապրիլի 2-ին  ՀՀ Նախագահ, Ազգային անվտանգության խորհրդի Նախագահ Սերժ Սարգսյանն անցկացրել էր  Ազգային անվտանգության խորհրդի նիստ: Օրակարգի շրջանակներում քննարկվել էին Ադրբեջանական հանրապետության կողմից 1994թ. զինադադարի համաձայնագրի կոպիտ խախտման և Լեռնային Ղարաբաղի Հանրապետության դեմ լայնածավալ հարձակման արդյունքում ստեղծված իրավիճակը: ՀՀ նախագահը հանձնարարել  էր Արցախի և Հայաստանի միջև ռազմական փոխօգնության համաձայնագիր մշակել: