Ձեր վստահելի աղբյուրը

Ապրիլին պատերազմի ընթացքում վիրավորված մի քանի զինծառայողներ տեղափոխվել են վերականգնողական կենտրոն, որտեղ առանձնահատուկ հաջողություններ են գրանցվում: Այս մասին այսօր կառավարության նիստի ավարտից հետո լրագրողների հետ զրույցում նշեց ՀՀ առողջապահության նախարար Արմեն Մուրադյանը:

«Տղաներից մեկի՝ Հայկի հետ, ով գլխուղեղի ներթափանցող վնասվածք ուներ, միասին քայլել ենք: Մյուս Հայկը ևս խոստացավ, որ կփորձի ոտքի կանգնել: Կուզեի, որ թերահավատություն չլինի հայկական բժշկության նկատմամբ, քանի որ այս պատերազմի ընթացքում նվազագույն սանիտարական կորուստներ ենք ունեցել՝ հաշվի առնելով, որ բժշկական աձնակազմն եղել է տղաների կողքին՝ ամենաբարձր արհեստավարժ գիտելիքներն ու հմտությունները ցուցաբերելով, նաև մարդկային ջերմություն ցուցաբերելով»,- ասաց նախարարը:

Նշենք, որ հայկական «Կարմիր խաչ» առողջության կենտրոնում այժմ վերականգնողական բուժում է ստանում երեք զինծառայող, որոնցից  2-ը` ծանր վիրավորումներ են ստացել Արցախում ապրիլյան հակամարտության վերջին օրերին: Երեք տղաներն էլ հենաշարժական ապարատի հետվնասվածքային խնդիրներ ունեն: Հայկ Թորոսյանի, Հայկ Սեխլիյանի և Արամ Սարյանի հետ միաժամանակ աշխատում է փորձառու մասնագետների մի ամբողջ խումբ:
Արմեն Մուրադյանն անդրադառնալով ծանր վիրավորներին՝ ասաց, որ ՀՀ ՊՆ Կենտրոնական կլինիկական զինվորական հոսպիտալում այս պահին մեկ զինծառայողի՝ Ռոլանդի վիճակն է գնահատվում ծայրահեղ ծանր:

Ծայրահեղ ծանր վիճակում գտնվող մի զինծառայող էլ՝ Ավետիսը, «Էրեբունի» բժշկական կենտրոնում է գտնվում:

Արմեն Մուրադյանը կարծում է, որ  վիրավոր զինծառայողների մեծամասնությունը կկարողանա շարունակել ծառայությունը:

Հարցին, թե «Կոմերսանտ» պարբերականը գրել էր, որ շփման գծում ապրիլյան գործողություններից հետո այրվածքների համար անհրաժեշտ դեղամիջոցներ չեն եղել, արտահերթ կարգով Ռուսաստանից են բերվել, Արմեն Մուրադյանն ասաց, որ առաջին անգամ է լսում, բազմաթիվ շահարկումներ կարող են լինել, ուստի պետք է զերծ մնալ այդ շահարկումներից: 

«Այն դեղերը, որոնք անհրաժեշտ են, այս պահին՝ կան: Զինծառայողներն այս պահին ստանում են ամենաբարձր կարգի բուժօգնությունը: Սա կարող եմ համոզված ասել»,- ասաց նա:

Ըստ նրա՝  Այրվածքաբանության կենտրոնում այսօր երկու ծանր հիվանդ է բուժում ստանում, որոնց մոտ դրական տեղաշարժ կա:

«Կարծում եմ՝ առողջապական համակարգն այս ընթացքում կարողացավ կատարել իր առջև դրված խնդիրները և նվազագույնի հասնցել սանիտարական կորուստները»,- ընդգծեց Արմեն Մուրադյանը: