Ձեր վստահելի աղբյուրը

Հայոց Ցեղասպանության 101-րդ տարելիցի գիշերը Ախալցխայի շրջանային ոստիկանության բաժնում տեղի ունեցած դեպքով հետաքրքրվել է Սամցխե-Ջավախքի շրջանային գլխավոր դատախազությունը: Այն սկսել է փաստի հետաքննություն: Այս մասին գրում է akhaltskha.net կայքը: 

Սամցխե-Ջավախքի շրջանային դատախազությունը տեղական լրատվամիջոցների նյութերի հիման վրա հետաքննություն է սկսել Ախալցխայի շրջանային ոստիկանական բաժանմունքում աշխատակազմի կողմից լիազորությունների հնարավոր գերազանցման փաստով, քրեական օրենսգրքի 333-րդ հոդվածով: 

Հիշեցնենք, որ ավելի վաղ «Ջավախք»  հայրենակցական միությունը ներկայացրել էր այդ դեպքից մանրամասներ. «Ապրիլի 23-ին ավանդական ջահերով երթից հետո Ախալցխայի շրջանի Ծղալթբիլա, Աբաթխև և Ծինուբան հայկական գյուղերի երիտասարդներն  ավանդույթի համաձայն բարձրացել են տեղի հայերի կողմից կառուցված  սրբավայրի մոտ` կրակ վառելու և այսպիսով  հարգելու  Հայոց  Ցեղասպանության  զոհերի  հիշատակը:  Հասնելով  սրբավայր` նրանք հանդիպել են հարևան Վալե քաղաքից մի խումբ վրացիների, ովքեր  խնջույք  էին կազմակերպել և գտնվել են ոչ սթափ վիճակում:  Չհասկանալով հայ երիտասարդների ուզածը` այդ մարդիկ  կռվի են բռնվել նրանց  հետ, սակայն որոշ ժամանակ անց  հասկացել  են միմյանց: Չնայած դրան՝ կեսգիշերին ոստիկանությունն իրենց տներից հանել և  ոստիկանական  տեղամաս  է տարել  բազմաթիվ  հայ երիտասարդների, որոնց ծեծի են ենթարկել, նվաստացրել և անգամ անվայել խոսքեր հնչեցրել Հայոց Ցեղասպանության հասցեին: Կատարվածը խիստ հուզել է ջավախքահայությանը»: