Մինչև տարածքային հարցեր առաջ քաշելն Ադրբեջանը պարտավոր է վերադարձնել ԼՂՀ-ի օկուպացված շրջանները. Շավարշ Քոչարյան
«Ռուսաստանի պաշտոնական դիրքորոշմանը մենք քաջ տեղյակ ենք, կարող են լինել տարբեր արտահայտություններ, մենք պարտավոր չենք բոլորին պատասխանել»,- այս մասին այսօր կառավարության նիստից հետո լրագրողների հետ զրույցում ասաց ՀՀ արտաքին գործերի նախարարի տեղակալ Շավարշ Քոչարյանը՝ անդրադառնալով ՌԴ դեսպանատան աշխատակցի այն հայտարարությանը, թե քանի դեռ Հայաստանն Արցախը չի ճանաչել, ռուսական զենք Արցախ չի կարող գնալ:
Ինչ վերաբերում է Հայաստանում ՌԴ դեսպան Իվան Վոլինկինի հայտարարությանը, թե՝ ցույց տվեք փաստաթղթեր, որ Ռուսաստանը շարունակում է զենք վաճառել Ադրբեջանին, Շավարշ Քոչարյանը նշեց, թե դրան պատասխանող այլ ատյաններ կան, որոնց առջև այդ հարցերը բարձրացվում են:
Անդրադառնալով Ուորլիքի այն հայտարարությանը, թե բանակցություններն ընթանալու են տարածքների զիջում կարգավիճակի դիմաց, փոխարտգործանախարարն ասաց, որ եթե խոսքը գնում է Մադրիդյան սկզբունքների մասին, որոնք գաղտնազերծված են երեք համանախագահող երկրների հինգ հայտարարություններով, ապա ակնհայտ է, որ խոսքը գնում է և՛ տարածքների մասին, և՛ կարգավիճակի մասին:
«Շատ կարևոր է արձանագրել հետևյալը, որ Ադրբեջանը փորձում է այդ ամբողջ փաթեթից դուրս բերել, դա նաև երեկ Գերմանիայում գտնվելիս Մամեդյարովի հայտարարությունն էր և իր պատկերացմամբ՝ խնդիրը լուծվում է՝ տարածքներ վերադարձնելով, և այլն, և այլն: Այսինքն՝ շատ կարևոր է արձանագրել հետևյալը՝ մինչև տարածքային հարցեր առաջ քաշելն Ադրբեջանը պարտավոր է առնվազն, եթե այդքան կարևորում է այդ հարցը, վերադարձնել Լեռնային Ղարաբաղի Հանրապետության օկուպացված շրջանները և ճանաչել Լեռնային Ղարաբաղը: Ինչո՞ւ: Որովհետև ճանաչելով՝ նա կունենա այն սուբյեկտը, որն իրավազոր է քննարկել նմանատիպ հարցեր: Հայաստանի Հանրապետությունը չի կարող այդպիսի հարցեր լուծել՝ Ղարաբաղի փոխարեն: Սա է ամենակարճ ճանապարհը, որպեսզի Ադրբեջանը հասնի իր բաղձալի նպատակին»,- ասաց Շավարշ Քոչարյանը:
Հարցին, թե ո՞ր տարածքների հանձնման մասին է խոսքը, նա պատասխանց. «Ես կխոսեմ այն տարածքների մասին, որն օկուպացրել է Ադրբեջանը: Դա Մարտունու շրջանն է, Մարտակերտի շրջանի հատվածներն են, դա Շահումյանի շրջանն է, իսկ ինչ ենք մենք հանձնելու, թող մտահոգի ադրբեջանցիներին: Ինձ դա չի մտահոգում»,- նշեց նա:
Լրահոս
Տեսանյութեր
Գիշեր-ցերեկ կաշխատենք, միայն առաջվա Հայաստանում ապրենք. Քաղաքացիները՝ աշխատաժամանակի կրճատման մասին
