Ձեր վստահելի աղբյուրը

Մայրական մահացության ցուցանիշը Հայաստանում նվազել է: Դա գրանցել են նաև միջազգային կառույցները: Կառավարության նիստի ավարտից հետո լրագրողների հետ զրույցում ասաց առողջապահության նախարար Արմեն Մուրադյանը՝ անդրադառնալով ապրիլի վերջին  «Սլավմեդ» ԲԿ-ում 37-ամյա ծննդկան Ն. Մուսայելյանի մահվան դեպքին:

Նախարարն ասաց, որ մայրական մահացության ցուցանիշի նվազումը ոլորտի պատասխանատուներին որևէ  կերպ չի հանգստացնում:

«Մենք ամենօրյա հսկողություն ենք իրականացնում կրիտիկական բոլոր դեպքերի հետ կապված: Ի՞նչ նկատի ունեմ կրիտիկական ասելով, եթե ծննդաբերությունը չի ավարտվել մահով, դա չի նշանակում, որ մենք չպետք է խոր ուսումնասիրություն իրականացնենք»,-ասաց նախարարը:

Մուրադյանը նկատեց, որ յուրաքանչյուր դեպքի վերաբերյալ ուսումնասիրության իրականացումը մայրական մահացության ցուցանիշի կրճատման լավագույն մեթոդներից մեկն է, որը խորհուրդ է տալիս Առողջապահության համաշխարհային կազմակերպությունը:

«Այս գործիքը աշխատեց Հայաստանում:  Յուրաքանչյուր դեպքի ուսումնասիրության համար մենք՝ ինքներս ստեղծում ենք հանձնաժողով: Եթե քրեական գործ է հարուցվում, ապա բոլոր նյութերը տրամադրում ենք իրավապահ մարմիններին»,-ասաց կառավարության ներկայացուցիչը:
Ա. Մուրադյանը մանրամասնեց, որ «Սլավմեդ»-ում գրանցված մահվան գործը գտնվում է իրավապահ մարմինների տիրույթում:

«Մեր մասնագետները, ինչպես խոստացել էինք, շատ արհեստավարժ են, շատ հետևողական և ամենակարևորը՝ անաչառ: Հաշվի առնելով, որ մենք ապրում ենք փոքր երկրում և բոլորը իրար ճանաչում են, արհեստավարժության սկզբունքները պետք է դնել ավելի բարձր»,-ասաց նա:

Նախարարը հիշեցրեց, որ մայրական մահացության ցուցանիշը, առհասարակ, բնութագրում է յուրաքանչյուր երկրի, հասարակության զարգացման աստիճանը: Հայաստանում այդ ցուցանիշը վերջին տարիներին սկսել է նվազել: