Ձեր վստահելի աղբյուրը

«Այս պատմության մեջ ամենավատը մեր դիվանագիտական աշխատանքն է, դեսպանի և դեսպամանտան աշխատանքը»,-այսօր լրագրողների հետ հանդիպմանն ասաց մշակույթի վաստակավոր գործիչ, «Կարին» ավանդական երգի-պարի համույթի գեղարվեստական ղեկավար Գագիկ Գինոսյանն՝ անդրադառնալով Ախալցխայի վերջին դեպքերին:

Հիշեցնենք, որ «Ջավախք»  հայրենակցական միությունը հանդես է եկել  հայտարարութամբ Ախալցխայում կատարված միջադեպի կապակցությամբ. «Սույն թվականի ապրիլի 23-ին ավանդական ջահերով երթից հետո Ախալցխայի շրջանի Ծղալթբիլա, Աբաթխև և Ծինուբան հայկական գյուղերի երիտասարդներն  ավանդույթի համաձայն բարձրացել են տեղի հայերի կողմից կառուցված  սրբավայրի մոտ` կրակ վառելու և այսպիսով  հարգելու  Հայոց  Ցեղասպանության  զոհերի  հիշատակը:  Հասնելով  սրբավայր` նրանք հանդիպել են հարևան Վալե քաղաքից մի խումբ վրացիների, ովքեր  խնջույք  էին կազմակերպել և գտնվում էին ոչ սթափ վիճակում:  Չհասկանալով հայ երիտասարդների ուզածը` այդ մարդիկ  կռվի են բռնվել նրանց  հետ, սակայն որոշ ժամանակ անց  հասկացել  են միմյանց: Չնայած դրան՝ կեսգիշերին ոստիկանությունն իրենց տներից հանել և  ոստիկանական  տեղամաս  է տարել  բազմաթիվ  հայ երիտասարդների, որոնց ծեծի են ենթարկել, նվաստացրել և անգամ անվայել խոսքեր հնչեցրել Հայոց Ցեղասպանության հասցեին»:

Գինոսյանի խոսքով տվյալ դեպքում, որպես այդպիսին, հայ-վրացական, ազգամիջյան բախում տեղի չի ունեցել, այլ սա ավելի շատ բախում է ոստիկանության հետ. «Տվյալ դեպքում կարծում եմ նաև այստեղ կան քաղաքական շահարկումներ, ընդիմմադիր մասը փորձում են սադրել հայերին՝ իրավիճակը լարելու համար: Պարզապես տեսնում ենք, որ սեղանին նստած են միայն վրացական իշխանությունն ու ընդդիմությունը, հայկական կողմը ոչինչ չի անում:  Հերթական անգամ տեսնում ենք, որ Ջավախքը միայն ջավախցու խնդիրն է, սակայն այն նույնքան համահայկական է, որքան Արցախը: Մենք երբևէ պետք է հասկանանք, որ դեսպան, դեսպանատուն ունենք Վրաստանում»:

Մշակույթի գործիչը ևս մեկ անգամ կոչ արեց, որ Ջավախքը ևս համահայկական խնդիր է:
«Կովկաս» ինստիտուտի գիտաշխատող, քաղաքագետ Հրանտ Միքայելյանն էլ նշեց, որ Ախալցխայի դեպքի պես Վրաստանում հաճախ են լինում, ուղղակի այս դեպքը հրապարակվեց հայկական մամուլում և շատ խոսվեց դրա մասին:

«Այս դեպքում ոստիկանությունը հայերի դեմ գործեց, որը կարծես մոդել է դարձել Վրաստանում: Նման փորձ չկա, որ ՀՀ դեսպանատունը Վրաստանում երբևէ տեղի հայերի խնդիրներով զբաղված լինի»,-ավելացրեց նա:

Բանախոսները ևս մեկ խնդիր ընդգծեցին, որ որևէ հայկական գիրք հնարավոր չի լինում Վրաստան տանել և Հայաստանը դրա դեմ որևէ քաղաքականություն չունի: