Ձեր վստահելի աղբյուրը

20 տարի… Յուրանքաչյուր տարի  Երևանի պետական կամերային երգչախմբի գեղարվեստական ղեկավար և խմբավար Հարություն Թոփիկյանը  հիշում է, համարում հաջողությունների, ձեռքբերումների տարիներ:

«20 տարեկան: Պարտքս եմ համարում հիշել 1996 թվականը, Գարեգին Առաջին Ամենայն Հայոց կաթողիկոսը հավատաց այս ծրագրին՝ ամբողջացնել, ձայնագրել ու տարածել Կոմիտասի աշխարհիկ խմբերգերը: Նա սկսեց ֆինանսավորել, աշխատանքն ընթացավ»,- լրագրողների հետ հանդիպման ժամանակ 20 տարի առաջ նվագախբի ստեղծման պատմությունը հիշելով՝ ասաց  ՀՀ արվեստի վաստակավոր գործիչ Հարություն Թոփիկյանը:

Նա նշեց, որ պայմանագիրը կնքված էր մեկուկես տարով, սակայն այն հետագայում երկրաձգվեց, քանի որ Գարեգին Առաջինը տեսել էր աշխատանքի բուռն ընթացքը, մղումը, երգչախումբն արդեն հրավերներ  էր ստանում:

«Առաջին հրավերը եղավ Իտալիայից՝ մասնակցել Ռավեննայի փառատոնին» , - ասաց արվեստի վաստակավոր գործիչը:

Նրա խոսքով, եղել են դժվար տարիներ, բայց միշտ ունեցել են հրաշալի ընկերներ, ովքեր պահել են ջահը: 2009 թվականին երգչախումբը ստացել է պետական կարգավիճակ:

Ասուլիսին ներկա «Կամերային երաժշտության ազգային կենտրոն»-ի տնօրեն, ալտահար Վաչե Հովեյանի խոսքով, երգչախումբը կանգնած է նորանկախ պետության հիմքերում:

Կոմիտասի անվան կամերային երաժշտության տանը մայիսի 16-ին կայանալու է Երևանի պետական կամերային երգչախմբի գործունեության 20-ամյակին նվիրված հոբելյանական համերգ:
Երևանի կամերային երգչախմբի ղեկավար Լաուրա Բասենցյանը տեղեկացրեց, որ համերգին մասնակցելու են շնորհալի, վաստակավոր արտիստներ, օպերային և բալետի թատրոնից մեներգիչներ, ճանաչված ջազ դաշնակահար Տիգրան Համասյանը:

«Հույս ունենք գոհ ու մեծ բավականություն  ստացած կհեռանա մեր հանդիսականը»,- նշեց նա: 

Խոսելով հանդիսատեսի մասին, Հ.Թոփիկյանն ասաց, որ երգչախումբն ունի հավատարիմ հանդիսական, համերգները, ինչպես արտասահմանյան հյուրախաղերի ժամանակ, այնպես էլ Երևանում, մշտապես անցնում են լեցուն դահլիճներում:

«Անշուշտ, դրսում մարդիկ ավելի հղկված են՝ ծափահարել լիարժեք, միշտ սպասել բեմից լավագույն մի բերկրանքի: Մեզ մոտ խելացի լինելու պատճառով կամ բարդույթով միշտ սխալ են փնտրում: Բայց գալ համերգ, լսել երաժշտություն… Միշտ պետք է շնորհակալ լինել, որովհետև կյանքում եթե քեզ մեկ ակնթարթ բերկրանք են տալիս, ամենաշնորհակալ վիճակը պետք է լինի: Արդեն սխալի հարցը, թերությունը դառնում է երկրորդական»,- ասաց   ՀՀ արվեստի վաստակավոր գործիչ Հարություն Թոփիկյանը:

Նշեք, որ երգչախումբը ձայնագրել է 10 ձայնասկավառակ: Երգչախմբի հիմնական երգացանկը ներառում է հայկական դասականների և ժամանակակից կոմպոզիտորների, ինչպես նաև եվրոպական ու ռուսական դասականների և ժամանակակից կոմպոզիտորների և ջազ կոմպոզիտորների աշխատանքներ: